1.4 Tueddiadau gwaith y dyfodol

Mae nifer o sefydliadau addysg uwch yn myfyrio ar y gwersi a ddysgwyd o'r ffyrdd ymatebol o weithio yn ystod y pandemig a datblygu eu harferion gwaith a'u polisïau i fewnosod ffyrdd mwy cynhwysol a rhagweithiol o weithio. Mewn addysg uwch (AU), mae hyn wedi arwain at fwy o amgylcheddau gweithio hybrid a datblygu eu galluoedd i ymateb i drawsnewid digidol. Er bod angen i sefydliadau lywio a gweithredu ymhellach, gall nifer gymryd dull mwy myfyriol. Gallant gymryd amser i gynllunio ar gyfer yr hyn sydd ei angen yn y tymor byr a'r tymor hir a pharhau i fewnosod ffyrdd mwy cynaliadwy o weithio.

Wrth i sefydliadau gynllunio ar gyfer y dyfodol, mae angen blaenoriaethu llesiant a disgwyliadau cyflogeion a phrofiad cyflogeion. Gan fod timau wedi'u gwasgaru fwy, efallai na fydd swyddogaethau uned draddodiadol yn briodol bellach ar gyfer y ffyrdd newydd hyn o weithio, felly mae angen datblygu strwythurau sefydliadol yn unol â'r newidiadau hyn.

Mae'r erthygl Gartner '9 Future of work trends post covid-19’ [Tip: daliwch Ctrl a chliciwch dolen i'w agor mewn tab newydd. (Cuddio tip)] (Turner a Baker, 2022) yn adnabod tueddiadau sydd â'r effaith fwyaf ar brofiad cyflogeion fel:

1. Gweithio hybrid yn dod yn brif ffordd o weithio
2. Prinder doniau allweddol
3. Llesiant yn fesurydd allweddol
4. Gallai canlyniadau amrywiaeth, ecwiti a chynhwysiant waethygu
5. Bydd trosiant yn cynyddu
6. Rolau rheolwyr yn newid
7. Mae'r Genhedlaeth Z eisiau profiadau gwaith wyneb yn wyneb
8. Mae wythnosau gwaith byrrach yn rhywbeth mae cyflogeion yn eu gwerthfawrogi bellach
9. Mae casglu data yn ehangu

Efallai eich bod yn adnabod rhai o'r tueddiadau hyn yn eich sefydliad heddiw, ac eraill sydd ar y gorwel o bosibl. O ran adnabod yr angen i gynllunio ar gyfer gweithio hybrid, awgryma Turner a Baker (2022) nad ydych chi ar eich pen eich hunan – yn eu herthygl nodant y byddai bron i 39% o sefydliadau yn peryglu colli cyflogeion petaent yn dychwelyd yn llawn i'r trefniadau o weithio ar y safle. Yn ôl y Swyddfa Ystadegau Gwladol (2022), o blith yr holl gyflogeion a arolygwyd, mae 84% o weithwyr a weithiodd gartref yn ystod y pandemig yn bwriadu gwneud cyfuniad o weithio gartref a gweithio yn eu safle gwaith yn y dyfodol.

Wrth gwrs, mae gwahaniaeth rhwng gweithio o bell mewn cyfnod o argyfwng byd-eang, lle mae unigolion a sefydliadau wedi gorfod addasu'n sydyn i weithio a dysgu gartref, a datblygu strategaeth hirdymor i gefnogi gweithwyr, cwsmeriaid a rhanddeiliaid eraill sy'n dewis gweithio gartref o leiaf peth o'r amser.

Golyga hyn, fel sefydliad, bod eich ymwybyddiaeth a'ch dealltwriaeth o ddisgwyliadau cyflogeion yn hollbwysig i reoli disgwyliadau ac am gynllunio effeithiol a datblygiad strategaeth. Clywn yn aml 'nad oes y fath beth ag un ateb i bob cwestiwn', ond ar gyfer sefydliad, y realiti yw bod rhaid i chi gael cydbwysedd er mwyn gweithredu'n effeithiol. Gall hyn ofyn am drawsnewidiad sylweddol. Yn erthygl McKinsey and Company 'Organizing for the future: Nine keys to becoming a future-ready company’ (De Smet et al., 2021), nodir bod angen ail-ddyfeisio, a chynigir y naw hanfod canlynol y bydd cwmnïau sy'n barod at y dyfodol yn meddu arnynt.

Maximise

(De Smet et al., 2021)

Ffigwr 7 Naw hanfod sefydliadol ar gyfer cwmnïau sy'n barod at y dyfodol

disgrifiad hir|Cuddio disgrifiad

Delwedd yn dangos tri chylch wedi'u plethu ynghyd yn y canol yn cynrychioli pwy ydym ni gyda'r testun canlynol: Gwneud safiad ynghylch diben. Defnyddio diwylliant fel eich pŵer hud. Mireinio'ch agenda gwerthoedd. O gwmpas y cylchoedd gyda llinellau yn cydgysylltu, mae pum cylch, yn cynrychioli sut ydym ni'n gweithio – Gwastadu strwythurau'n sylweddol, Trin doniau yn brinach na chyfalaf, Cyflymu’r broses o wneud penderfyniadau, ac yna tri chylch yn cynrychioli Sut ydym yn tyfu – Datblygu llwyfannau technoleg sy'n llawn data, Cyflymu dysgu sefydliadol, Cymryd persbectif ecosystem.

Ffigwr 7 Naw hanfod sefydliadol ar gyfer cwmnïau sy'n barod at y dyfodol

Gall y tueddiadau a'r hanfodion fod yn feysydd yr ydych chi eisoes yn eu hystyried, ond mae cyflawni strategaeth o'r fath yn gofyn mynd ar daith o ddeall pam eich bod eisiau ei wneud, i ystyried yr her o bob persbectif (o bersbectif sefydliadol, personol a chymdeithasol) i gynllunio'n ofalus a rheoli newid – a'r cwbl mewn cyd-destun o ansicrwydd parhaus.