5.4 ‘Islands in the Sky’ – y fethodoleg
Gall ‘Islands in the Sky’ helpu i amlygu dealltwriaethau am heriau a chyfleoedd y dyfodol. Mae'n creu lle ar gyfer trafodaeth greadigol a syniadau newydd yn ymwneud â phosibiliadau gwahanol yn y dyfodol, er mwyn datblygu strategaethau'r dyfodol.
Fel arfer, y dull ar gyfer hwn fyddai gweithdai gyda grŵp amrywiol o gyfranogwyr, er mwyn sicrhau bod ystod o leisiau yn yr ystafell. Mae chwe cham i'r fethodoleg:
- Cadarnhau'r diben (fel arfer, byddwch yn gwybod beth ydych chi eisiau ei archwilio cyn mynychu gweithdy, ond cofiwch atgoffa'r mynychwyr o'r diben).
- Mapio'r amgylchedd gweithrediadol – perthnasoedd mewnol ac allanol sydd ynghlwm â'r genhadaeth.
- Labelu'r perthnasoedd gyda gwerth 'cymdeithasol' a 'swyddogaethol' ar gyfer bob parti.
- Adnabod yr ansicrwydd sy'n llywio penderfyniadau ar yr ynys, a sut all y rhain amlygu eu hunain yn y dyfodol.
- Adolygu'r cyfleoedd a'r heriau:
- dewiswch y rheini sydd angen rhagor o ymchwilio neu y gellid eu datblygu
- rhowch y ddysg ar waith.
- Adborth a dilyniant.
Yn y fideo, cynigia Dr Matt Finch ddealltwriaethau am sut allwch chi ddefnyddio ac addasu ‘Islands in the Sky’ at eich dibenion a sgyrsiau gwell. Wrth i chi ddarllen drwy gamau'r fethodoleg, myfyriwch ar y dealltwriaethau y mae'n eu rhannu.
Download this video clip.Video player: Fideo 16
Transcript: Fideo 16 Addasu ‘Islands in the Sky’ ar gyfer sgyrsiau gwell
MATT FINCH
Ar ôl i chi ddefnyddio Islands in the Sky i ymweld â'r dyfodol credadwy, heriol a dychmygus, y cwestiwn i'w ofyn yw sut mae dod â hwnnw nôl i'r presennol? A gall hynny ddigwydd mewn ffyrdd amrywiol. Ond efallai mai'r peth symlaf yw defnyddio'r safbwynt ffafriol i'r dyfodol a dweud, beth os mai dyna'n sicr oedd y dyfodol a oedd o'n blaenau ni? Pe byddem yn gwybod ein bod yn mynd tuag at yr ynys honno, beth ddylem stopio, dechrau neu barhau i'w wneud? Pa sgyrsiau newydd dylem ddechrau eu cael heddiw os oeddem yn gwybod bod actorion newydd yn mynd i fod ar yr ynys gyda ni yn y dyfodol?
Ac yn arbennig o ran y cwestiwn stop, mae ysfa bob amser i wneud mwy, gwneud mwy, ehangu, ymestyn ein cwmpas. A phan fyddwn yn meddwl am beth dylem ei stopio'n strategol, rydym yn meddwl bron bob amser am rywbeth sydd yn amlwg yn negyddol neu'n feichus. Ond y cwestiwn go iawn gyda strategaeth yw'r cyfaddawd hwnnw. Rwy'n mynd i wneud x, nid y a dyma yw'r rheswm rwy'n gwneud y dewis hwnnw.
Felly, pan fyddwch yn edrych ar y stop, gallech chi edrych ar yr ynysoedd rydych chi wedi'u creu, meddwl am y trafodaethau rydych chi wedi'u cael, ac yna dweud, os dyna'n sicr oedd y dyfodol o'n blaenau ni, beth arall da a gwerth chweil fyddwn yn ei ildio, aberthu, llesteirio neu'n rhoi'r gorau iddo oherwydd fy mod i wedi penderfynu bod rhywbeth arall yn bwysicach? A thrwy gael casgliad o ddyfodolion dychmygus, ynysoedd gwahanol, y mae pob un ohonynt yn wahanol i'r un rydych chi'n byw arni ar hyn o bryd neu'r un rydych chi'n disgwyl byw arni, yn gadael i chi greu math o lyfr chwarae o opsiynau.
Gallwch feddwl amdanoch eich hun bron fel dringwr creigiau yn ceisio mynd i fyny mynydd. Mae llwybrau gwahanol i'r copa. Mae'n bosibl y bydd rhai ohonynt wedi'u marcio. Gallech roi cynnig ar rai ohonynt ac archwilio a mynd eich ffordd eich hun. Ond mae'r hyn rydych chi wedi'i wneud trwy gael y sgwrs hon wedi'i ymarfer. A nod yr ymarfer hwnnw yw eich helpu i wneud penderfyniad doethach heddiw yn seiliedig ar feddwl yn wahanol am yr hyn a allai fod o'ch blaenau.
Ac un o'r pethau y gall methodoleg Islands in the Sky ei wneud yw rhoi ynysoedd i chi yn y dyfodol y gallwch ddweud wedyn, beth fyddai pobl ar yr ynys hon yn ei feddwl? Beth fyddai eu barn? Mewn byd wedi'i drawsnewid gan drychineb hinsawdd, beth fyddent yn ei feddwl am y ffordd rydym yn defnyddio tanwydd ffosil, y ffordd rydym yn defnyddio deunyddiau? A fyddant yn ein beirniadu ni yn yr un ffordd ag yr ydym ninnau'n beirniadu rhai o genedlaethau'r gorffennol am bethau na allent fod wedi'u rhagweld o bosibl?
Felly, credaf ein bod ni i gyd yn gyndeidiau ar ddyfodol sydd heb gyrraedd eto i ryw raddau. Ac mae hynny'n cynnwys meddwl am beth fydd yn cael ei ystyried yn dda ac yn ddrwg, beth rydym yn mynd i'w werthfawrogi, pwy sy'n mynd i gael pŵer a braint, pwy sy'n mynd i gael hawliau a chyfrifoldebau, pwy fydd yn cael yr hawl i ddweud ein bod ni'n perthyn i'r tir neu fod y tir yn perthyn i ni. Felly, dydw i ddim yn meddwl mai fy lle i yw rhoi barn ar y pethau hyn, ond yn hytrach ceisio dod o hyd i ffyrdd o ddechrau'r sgwrs honno, a allai fod yn sgwrs ddewr iawn.
Fideo 16 Addasu ‘Islands in the Sky’ ar gyfer sgyrsiau gwell
Interactive feature not available in single page view (see it in standard view).