5.6 ‘Better Value Sooner Safer Happier’
Mae dewis y dull cywir ar gyfer y broblem y mae angen i chi ymdrin â hi yn bwysig, yn enwedig os ydych yn canolbwyntio ar broblemau sy'n gysylltiedig â thrawsnewidiad digidol. Gall dulliau sydd wedi esblygu yn seiliedig ar y defnydd o dechnoleg eich arwain chi a'ch helpu i ddarganfod dealltwriaethau sy'n benodol i ymdrin â phenderfyniadau a/neu broblemau sy'n ymwneud â thrawsnewidiad digidol.
Mae'r dull ‘Better Value Sooner Safer Happier’ (BVSSH), a ddatblygwyd gan Jonathan Smart a chydweithwyr (2022), yn eich helpu chi i ddiffinio'ch problem ac mae'n cynnig map trywydd pwerus i gyflawni'ch amcanion a mesur llwyddiant eich canlyniadau. Fel nifer o rai eraill, wrth wraidd dechrau'r dull oedd 'pam?' (megis: Pam mae angen ffordd well o weithio a ffordd well o greu gwerth?) a ddeilliodd o'u gwaith gyda chwmnïau technoleg gwybodaeth.
Mae Sooner Safer Happier yn werslyfr yn seiliedig ar ddegawdau o brofiad ymarferol o wella ffyrdd o weithio mewn cannoedd o sefydliadau. Caiff y ddysg ei strwythuro mewn wyth 'patrwm’ a ‘gwrth-batrwm’ ar gyfer gwytnwch busnes.
Mae patrwm yn ymateb i sefyllfa sydd, yn amlach na pheidio, yn effeithiol ac yn gwella canlyniadau a ddymunir. Wrth gwrs, daw hyn â'i fanteision a'i anfanteision, yn ôl ac ymlaen, mae'r cwbl yn ymwneud â'r bobl. Gall patrwm helpu i greu momentwm ar gyfer newid.
Y gwrth-batrwm yw defnyddio Trawsnewidiad Gwydn ar draws eich sefydliad, gyda chwmpas/cyllideb/cynllun diffiniedig, h.y. cymhwyso hen ffyrdd o feddwl at ffyrdd newydd o feddwl, sy'n annhebygol o greu'r buddion a ddymunir.
Eglura tabl 10 y math o broblemau sefydliadol all y patrymau hyn gynorthwyo gyda nhw.
| Problem sefydliadol | Canlyniad a ddymunir |
|---|---|
| 'Rydym yn rhy ddrud ac yn aneffeithlon. Mae'n anodd cyflawni unrhyw beth, ac mae diffyg egni yn y sefydliad yn ein dal yn ôl. Mae'r gost o newid yn uchel ac yn cymryd llawer o amser. Rhaid i ni fod yn fwy effeithlon!' | Hoffwn gyflawni gwerth yn fwy effeithlon |
| 'Rhaid i ni wella o ran rheoli buddion. Nid ydym yn gwybod pa werth mae ein buddsoddiadau mewn newid yn eu hychwanegu, dim ond barn ydyw. Rhaid i ni wella'r modd yr ydym yn mynegi, yn mesur, ac yn blaenoriaethu'r gwerth uchaf!' | Hoffwn gyflawni'r gwerth uchaf |
| 'Mae pethau'n cymryd yn rhy hir. Os na fyddwn yn newid, ni fyddwn yma mwyach. Mae ein cystadleuwyr ar y blaen. Mae gwneud dim yn golygu ein bod yn mynd yn ôl yn gyflym. Rhaid i ni gyflymu.' | Hoffwn leihau'r amser a gymerir i gyflawni gwerth |
| 'Pan mae ein timau cyflawni yn wynebu risgiau a rheolaeth, nid oes gwahaniaeth a ydynt yn wydn ai peidio, mae'r cwbl yn arafu i'r un cyflymder. Gall deimlo fel bod gennym rwystrau llywodraethiant, ond eto mae pethau'n cael eu rheoleiddio'n ofalus iawn a rhaid i ni reoli risg a chynnal ymddiriedaeth reoliadol.' | Hoffwn gael cyflymder a rheolaeth |
| 'Mae ein pobl gorau yn gadael. Mae'r farchnad ddoniau mor gystadleuol. Mae ein trosiant staff yn wirioneddol wastraffus. Rydym yn colli gwybodaeth ac enw da. Rhaid i ni wella o ran denu a chadw'r doniau gorau.' | Rwyf eisiau gweithlu sy'n cyfrannu fwy |
| 'Rydym yn gwastraffu llawer o amser yn meddwl. Ceir mân welliannau, ond nid oes unrhyw ddealltwriaeth gyffredin. Mae gan bawb safbwyntiau mor ddiysgog. Gall y dadleuon fynd yn danllyd. Mae angen canolbwyntio ein hegni ar wneud gwahaniaeth go iawn.' | Hoffwn wybod pam mae ffyrdd o weithio o bwys |
| 'Rydym wedi bod yn sgwrsio am drawsnewid ers cryn dipyn o amser ac wedi dechrau arni. Rydym yn gwneud peth gynnydd mewn TG ond nid yw'r sefydliad ehangach yn teimlo'r budd hyd yn hyn. Fel tîm arwain, hoffem wella canlyniadau ac rydym eisiau newid parhaol.' | Hoffwn feithrin newid diwylliannol |
| 'Er mwyn i'n sefydliad oroesi a ffynnu, gwyddom fod angen i ni addasu'n gyflym. Mae'r raddfa o newid yn ddychrynllyd, ac nid ydym yn siŵr lle mae dechrau gwneud y newidiadau hyn.' | Hoffwn wybod lle mae dechrau/ail-ddechrau |
| 'Mae ein cyllid buddsoddiad ynghlwm ag achosion busnes manwl a chylchredau prosiect blynyddol. Anodd yw deall sut bell all model ariannu fod mewn perthynas â'r ffyrdd newydd o weithio.' | Hoffwn wybod sut mae ariannu ystwythder |
(Sooner Safer Happier Ltd, 2022)
Yn y fideo isod, eglura Myles Ogilvie a Matt Turner (y ddau yn Benaethiaid yn Sooner Safer Happier Limited) egwyddorion Better Value Sooner Safer Happier.
Download this video clip.Video player: Fideo 20
Transcript: Fideo 20 Cyflwyniad i Better Value Sooner Safer Happier
MATT TURNER:
I mi, mae Better Value Sooner Safer Happier fel lens, sef ffordd y gall sefydliad weld ei hun, gweld sut y bydd yn dysgu, gweld sut y bydd yn dechrau deall ei ddiben, ac yna mireinio pa mor addas ydyw ar gyfer y diben hwnnw.
MYLES OGILVIE:
Mae Better Value Sooner Safer Happier yn cyfeirio at nifer o ddeilliannau y mae angen i sefydliadau sy'n ceisio gwella ystwythder busnes ganolbwyntio arnynt. Mae cyfanswm o tua wyth patrwm wedi'u cynnwys yn yr iaith hon ar gyfer gwella ystwythder busnes. Y cyntaf a'r pwysicaf yw'r ffocws ar ddeilliannau. Mae hyn yn mynd yn groes i ffyrdd traddodiadol o wella effeithiolrwydd sefydliadau, sy'n tueddu i ganolbwyntio ar ddull a phroses a fframwaith.
Felly, rhowch ddull newydd ar waith, a bydd hynny'n rhoi canlyniadau gwell i chi. Ond, yn aml, ni fydd hynny'n gweithio. Mae Better Value Sooner Safer Happier yn argymell canolbwyntio ar ddeilliannau, ac ar y rhai y gwelwn ei bod yn ddefnyddiol i bawb ganolbwyntio arnynt a'u mesur.
‘B’ am ‘Better’. Mae'n golygu ansawdd-- gwell ansawdd. Felly mae hynny'n golygu canolbwyntio ar wella cywirdeb prosesau, lleihau cwynion, lleihau toriadau, lleihau digwyddiadau, felly gwella ansawdd. Mae yna amrywiaeth o wahanol fesurau y gallech ddewis eu rhoi ar waith yn eich cyd-destun er mwyn gwybod eich bod yn gwella ansawdd. Mae ansawdd da yn ddeilliant.
‘Value’ o fewn Better Value Sooner Safer Happier yw'r rheswm y mae eich sefydliad yn bodoli. Dyna yw ei bwrpas. Os mai elusen ydych chi, mae'n golygu'r buddiannau cymdeithasol elusennol rydych chi'n eu sicrhau. Os mai sefydliad ariannol ydych chi, mae'n golygu'r gwasanaethau ariannol rydych chi'n eu cynnig. Ac os mai prifysgol ydych chi, gallai olygu'r addysg rydych chi'n ei rhoi.
Felly, gwerth yw'r rheswm rydych chi'n bodoli, a gallwch fesur y gwerth rydych chi'n ei gael drwy eich sefydliad gan ddefnyddio amcanion neu ddeilliannau gyda chanlyniadau allweddol. Mae ‘OKRs’ yn fyrfodd poblogaidd yn y maes hwn yn gyffredinol ar hyn o bryd-- ‘Outcomes with Key Results’ yn Saesneg, neu ddeilliannau gyda chanlyniadau allweddol. Ond mae hyn yn golygu cynnwys rhannu gwerth yn unedau llawer manylach a'u mesur yn fwy nag a wnaed yn y gorffennol.
Mae ‘Sooner’ yn golygu mesur amser paratoi, mesur y gyfradd brosesu, a mesur effeithlonrwydd llif. Felly, mae'n ymwneud â pha mor gyflym y gall eich sefydliad sicrhau newid. Mae ‘Safer’ yn golygu mesur gweithgarwch rheoli risg, gan newid o ddull ymatebol o ddelio â'r risgiau tuag at fynd ati'n rhagweithiol i ddatrys risgiau cyn iddynt ddod i'r amlwg.
Felly, mae nifer o fesurau'n gysylltiedig â bod yn fwy diogel. Mae ‘Happier’ yn golygu mesur y deilliannau o ran hapusrwydd cwsmeriaid a chydweithwyr. Felly, yn Better Value Sooner Safer Happier, neu BVSSH, yr hyn a welwn pan fyddwn yn eistedd gyda thîm arwain unrhyw sefydliad, ac yn siarad am y problemau sydd ganddynt yn y sefydliad hwnnw, yw y gellir didoli'r problemau i'r pum categori hynny fel arfer.
Datblygwyd Better Value Sooner Safer Happier am fod natur gwaith wedi newid. Mae wedi newid o fod yn gymhleth-- felly yn ystod oes masgynhyrchu, mae peiriannau a chydrannau yn gymhleth. Mae angen sgiliau a gwybodaeth i gydosod peiriannau cymhleth. Ond maent wedi'u dylunio. Maent yn hysbys. Mae'r cynnyrch rydych chi'n ei greu yn hysbys.
Mae'r cof yn diffinio gwaith fel rhywbeth cymhleth, hyd yn oed os oes llawer o elfennau iddo. Felly, mae natur gwaith wedi newid o fod yn gymhleth i fod yn gymhlyg. Pan fyddwn yn arloesi ym maes meddalwedd, bydd hynny'n waith cymhlyg. Felly, ni all yr hyn y mae angen i chi ei ddatblygu fod yn hysbys pan fyddwch yn dechrau ceisio ei ddatblygu, oherwydd nid ydych yn gwybod sut y bydd defnyddwyr y feddalwedd honno yn ymateb iddi. Nid yw pobl yn gwybod beth sydd ei eisiau arnynt nes y byddant yn ei weld yn gweithio yn eu dwylo.
Mae'n amgylchedd cymhlyg; mae llawer o bethau'n newid yn eich maes, ac ni allwch wybod beth rydych chi'n ceisio ei ddatblygu nes y bydd wedi'i ddatblygu. Synhwyro a dysgu drwy'r amser yw'r hyn sydd ei angen. Dyna pam mae natur gwaith yn wahanol mewn sefydliadau a gaiff eu hwyluso gan feddalwedd.
Drwy ddilyn dull Better Value Sooner Safer Happier, byddwn yn synhwyro drwy'r amser, ac yn dysgu a ydym yn mynd i'r cyfeiriad cywir. Os ydym, rydym yn ehangu. Os nad ydym, rydym yn lleihau. Mae syniadaeth ystwyth a darbodus wir yn greiddiol i hyn, ac mae pob rhan o ddiwydiant wedi cydnabod bod hyn yn hanfodol.
Fodd bynnag, ymateb i sefydliadau sy'n ceisio croesawu syniadaeth ystwyth a darbodus drwy roi'r dulliau hynny ar waith ar lefel dorfol yw Better Value Sooner Safer Happier. Mae gan sefydliadau traddodiadol sydd o natur ddiwydiannol, sef y rhan fwyaf o'n heconomi ar hyn o bryd, feddylfryd diwydiannol o hyd. Felly, maent yn gweld rhywbeth sy'n edrych fel dull.
Mae yna dueddiad i fod yn awyddus i'w roi ar waith ar lefel dorfol. Ond mae hynny'n camddeall gwir ystyr syniadaeth ystwyth a darbodus. Mae yna newid diwylliant. Dulliau diwylliannol yw'r rhain yn bennaf. Drwy ganolbwyntio ar ddeilliannau, sef Better Value Sooner Safer Happier gwelwn fod hyn yn ffordd fwy effeithiol i'ch sefydliad groesawu'r newidiadau hyn na cheisio rhoi proses ar waith gyda llwyth o swyddi newydd a llawer o gymhlethdod ynglŷn â'r ffordd y dylai'r broses honno weithio.
Er enghraifft, gallwn edrych ar Nokia – pan oedd yn creu system weithredu Symbian, roedd yn buddsoddi llawer iawn mewn dulliau ystwyth ar y pryd. Enillodd y cwmni wobr am fod y sefydliad mwyaf ystwyth ychydig cyn iddo fynd i'w wal. Ni wnaeth y dull achub y sefydliad hwnnw.
Yr hyn na lwyddodd i'w wneud oedd ystyried pa mor gyflym y byddai'n gallu cyflawni gyda'i strwythur technegol penodol ar y pryd. Nid oedd yn mesur deilliant llif, neu'r elfen ‘Sooner’. Felly, nid oedd yn gallu cynnal y cyflymdra o gwbl. Pe bai wedi llwyddo i wneud hynny, byddai’n gwneud pethau gwahanol, fel dylunio mewn ffyrdd gwahanol, yn hytrach na chanolbwyntio ar ddulliau ystwyth.
Felly, mae Better Value Sooner Safer Happier yn eich annog i fesur y deilliannau sydd bwysicaf i chi, ac yna roi unrhyw fath o newidiadau ar waith-- boed yn sefydliadol, yn dechnegol, yn gymdeithasol neu ym maes arweinyddiaeth ddiwylliannol. Felly, mae yna amrywiaeth o wahanol newidiadau y gallech geisio eu rhoi ar waith. Ac nid ydym yn rhagnodol ynglŷn â'r ffordd y gallai'r dulliau hynny weithio.
O ran y dull sy'n canolbwyntio ar bobl, yr hyn rydym yn ei weld yw ein bod yn siarad am helpu sefydliadau i ddysgu. Er mwyn i bobl ddysgu, mae angen iddynt gael amgylchedd diogel i bobl allu dysgu am wahanol bethau, a synhwyro a newid eu hymddygiad ac addysgu – mae angen i'r amgylchedd hwnnw fod yn un diogel iddynt ymddwyn ynddo. Ym mhob rhan o'n diwydiant a'n heconomïau heddiw, mae llawer o bobl wedi'u cyflyru ac yn cael eu haddysgu i ddilyn proses.
Ni chânt eu haddysgu i ddysgu'n barhaus. Felly, mae dull sy'n canolbwyntio ar bobl wir yn allweddol er mwyn i ni newid hynny, a galluogi pobl i arbrofi ac archwilio, a theimlo'n hyderus ac yn ddiogel o wybod y bydd rhai pethau'n gweithio, a rhai pethau'n methu. Ond dysgu yw'r peth mwyaf gwerthfawr yn hyn o beth.
Yn y gorffennol, byddai rheolwyr mewn sefydliad, mewn cyd-destun diwydiannol, yn penderfynu beth roedd angen i'r sefydliad a'r bobl ei wneud yn seiliedig ar wybodaeth a phrofiad y rheolwr. Dyna sut roedd sefydliadau traddodiadol yn gweithio. Ond yn yr oes ddigidol, gwyddom mai'r bobl sydd agosaf at ddefnyddwyr pa gyfleuster meddalwedd bynnag sydd dan sylw yw'r rhai y bydd angen iddynt synhwyro a dysgu..
Felly, y bobl sydd agosaf at y gwaith sydd wir yn gwybod pa waith sydd ei angen, ac nid y rheolwyr sy'n cyfarwyddo hynny mwyach. Dyna pam mae canolbwyntio ar bobl yn bwysig. Mae rôl y rheolwr wedi newid. Maent bellach yn gyfrifol am roi cymorth i bobl, yn hytrach na rheoli pobl.
Ac o ran rhoi cymorth, eu rôl yw galluogi a grymuso timau i gyflawni'r deilliannau y mae angen i'r sefydliad eu cyflawni. Er mwyn i ni ganolbwyntio'n fwy ar bobl, felly, yr hyn sy'n allweddol yw bod y diben wir yn cael ei egluro'n glir. Yn aml mewn sefydliadau, gwelwn fod y diben ar goll, hyd yn oed os oes strategaeth gyffredinol y gellir ei mynegi mewn iaith mor gyffredinol fel nad yw'r sefydliad wir yn deall beth yw ei strategaeth.
Nid yw wir yn mesur y camau cynnydd bach y mae'n eu cymryd tuag at hynny. Mae angen i'r diben a'r cyfeiriad a'r cynnydd fod yn glir iawn er mwyn i bobl ddeall p'un a ydym yn symud i'r cyfeiriad cywir ai peidio. Er mwyn i dimau gyd-fynd a'r uchelgais hwnnw, ac er mwyn i dimau deimlo'n ddiogel yn rhoi cynnig ar bethau ac yn arbrofi, ac er mwyn cael ffyrdd o gefnogi hynny, mae angen diogelwch seicolegol. Ac mae gan reolwyr ac arweinwyr rôl allweddol yn y broses o alluogi'r amgylchedd hwnnw o ymddiriedaeth tîm i bobl.
Felly, mae mesur y system waith yn seiliedig ar fod yn well, ansawdd, cyrraedd y farchnad yn gyflymach a chyflawni'n fwy diogel ac annog cydweithwyr i ymroi'n fwy-- Better Value Sooner Safer Happier – mae mesur y system waith yn hollbwysig i ni er mwyn gwella'n barhaus. Ac mae hynny'n bwysicach na chostau. Yn y gorffennol, byddai syniadaeth prosiectau'n aml yn canolbwyntio ar reoli costau. Fel arfer, o'n profiad ni, pan fyddwch yn canolbwyntio ar y gost, bydd y gost yn cynyddu, neu o leiaf bydd y gwerth a gewch yn lleihau yn anghymesur â'r lleihad yn y gost. Felly, byddech yn cael llai am lai.
Os ydych yn canolbwyntio ar system waith ac yn optimeiddio'r system waith drwy'r amser, bydd y gost yn gofalu amdani hi ei hun. Wrth i'r llif gynyddu, bydd effeithlonrwydd yn gwella. Ac mae'r gwerth yn y canol, y gwnaethom sôn amdano'n gynharach, yn fesur ar wahân. Hynny yw, yr amcanion gyda chanlyniadau allweddol, sy'n allweddol er mwyn deall y gwerth. Felly, rydym yn ceisio optimeiddio'r system waith a chanolbwyntio ar y gwerth.
Pe baech yn trosi hyn i'r hen ffordd o siarad, byddem yn siarad am ddadansoddiadau costau a manteision ar gyfer y prosiect neu rywbeth felly. Ond yr hyn rydym yn siarad amdano yma mewn gwirionedd yw manylu ar y manteision oherwydd, yn aml, pan fyddwch yn dadansoddi costau a manteision prosiect, caiff y costau eu micro-reoli i lawr i'r geiniog agosaf, a chaiff y manteision eu hanwybyddu a'u hanghofio'n llwyr. Ac nid yw hynny'n ddefnyddiol. Felly, drwy ganolbwyntio ar y manteision, y gwerth a'r canlyniadau allweddol sy'n gysylltiedig â'r gwerth hwnnw, ac yna optimeiddio'r system waith yn barhaus, rydym yn galluogi sefydliadau i gael y deilliannau y mae gwir angen iddynt eu cael.
MATT TURNER:
Gyda Better Value Sooner Safer Happier, yr hyn rydym yn ceisio ei gyflawni yma gyda phobl yw eu galluogi i weld nad ydym yn gwybod beth rydym yn mynd i'w gyflawni pan fyddwn yn ymgymryd â menter newid. Ond mae gennym ffyrdd o ddeall cyn gynted â phosibl sut rydym yn cyflawni hynny. Felly, yr hyn na fyddwn yn ei ddweud wrth sefydliad yw, dyma sut mae gwneud hyn. Byddwn yn mapio eich holl ymddygiadau a'ch ymarferion a'ch arferion dros y ddwy flynedd nesaf.
Yr hyn a fydd yn eich tywys wrth wneud hyn yw, sut y byddech chi'n gwybod a yw pethau'n mynd yn iawn ai peidio? Beth yw'r arferion hynny? Yn y bôn, gallwch symleiddio'r cyfan yn ôl i bethau fel y dull gwyddonol. Ond sut mae gwybod beth sy'n digwydd yn y byd o'n cwmpas?
Ar gyfer sefydliadau addysg uwch, mae'n beth da dangos y tebygrwydd rhwng hyn ac epistemoleg, efallai. Sut mae gwybod ein bod yn gwybod? A'r hyn rydym yn ei nodi yn y llyfr, yr hyn rydym yn ei ddisgrifio yn y llyfr Sooner Safer Happier, yw'r ffyrdd hynny o ddeall sut y byddem yn gwybod.
Sut y byddem yn cynnal yr arbrofion hyn? Beth yw disgyblaeth mewn byd cymhlyg lle na wyddom beth fydd yn gweithio neu'n methu? Petai popeth yn mynd yn ôl y disgwyl, pe baem yn cyrraedd diwedd y prosiect dwy flynedd a bod popeth wedi mynd yn ôl y disgwyl, ni fyddai angen dysgu dim.
Ond gwyddom ein bod mewn byd cymhlyg ac ymaddasol nawr. Gwyddom fod yr oes ddigidol yn golygu y gall pethau darfu arnoch o bob cyfeiriad. Felly, ni allwn reoli'r amgylchedd hwnnw am ei fod mor gymhlyg. Gwyddom fod hynny'n golygu na fydd pethau'n mynd yn unol â'r disgwyl. Felly, y peth pwysicaf yw ein bod yn dysgu mor gyflym â phosibl.
Better Value Sooner Safer Happier yw'r disgyblaethau a'r arferion hynny a'r ffyrdd hynny o gyflawni ac mae hynny'n golygu wynebu newid, fel ein bod yn cael ein synnu cyn lleied â phosibl. Un o'r pethau pwysig eraill ynglŷn ag ystwythder a'r ffordd y mae'n wahanol i ffyrdd traddodiadol o gyflawni newid yw y byddech, mewn ffyrdd traddodiadol o gyflawni newid, yn aml yn gofyn i bobl, beth hoffech chi ei gael? Ac rwyf i am i chi fod yn ddisgrifiadol iawn, iawn ac yn benodol iawn, iawn ac yn sicr ynglŷn â'r hyn yr hoffech ei gael ar ddiwedd y ddwy flynedd, a byddwn ni'n gofyn hynny i chi ar y cychwyn cyntaf. Felly, byddwn yn benodol iawn ynglŷn â hynny.
Wedyn, ar ôl i chi ddisgrifio hynny, ni fydd modd ei newid. Bydd hynny'n rhan o'r contract o hynny ymlaen. Felly dyna a gewch chi ar ddiwedd y ddwy flynedd. Ac, yn amlwg, mae llawer iawn o risg yn gysylltiedig â hynny am fod y byd yn newid mor gyflym.
Efallai y bydd gwrthryfeloedd yn Nwyrain Ewrop. Efallai y bydd pandemig byd-eang o un wythnos i'r llall. Felly, ni fyddech am gadarnhau hynny ddwy flynedd cyn cyflawni rhywbeth. Gydag ystwythder, gyda Better Value Sooner Safer Happier, yr hyn rydym yn ei ddisgrifio yw sut y gallwch newid eich meddwl yn ddiogel pan fyddwch yn dechrau deall y dylem newid ein meddwl, siŵr o fod.
MYLES OGILVIE:
Bydd yna nifer o elfennau i'w cofio pan fyddwch yn ceisio gwella drwy ddefnyddio Better Value Sooner Safer Happier. Mae canolbwyntio ar y deilliannau a'u mesur yn un o'r elfennau allweddol i'w cofio. Ond mae yna saith patrwm arall rydym yn cydnabod y byddant yn helpu.
Y cyntaf yw meddwl yn nhermau cyflawni pethau mawr drwy gymryd camau bach. Hynny yw, meddwl am carpaccio trawsnewid. Os byddwch yn ceisio gwneud newidiadau er mwyn gwella eich sefydliad yn unol â Better Value Sooner Safer Happier, gwnewch newidiadau bach. Gallwch wneud newidiadau bach yn gyflymach. Bydd pobl yn dysgu amdanynt yn gyflymach, a bydd yn haws i chi ddeall a fyddant wir yn ychwanegu gwerth.
Felly, carpaccio trawsnewid-- yn yr un modd ag y byddech wedi ystyried cael cynnyrch sylfaenol hyfyw, efallai, os byddwch yn ceisio datblygu meddalwedd, meddyliwch am drawsnewid sylfaenol hyfyw. Gwnewch newidiadau bach iawn. Meddyliwch ar raddfa fawr. Mae gennych eich cenhadaeth i wella eich sefydliad mewn rhai ffyrdd penodol. Ond dechreuwch ar raddfa fach a dysgwch yn gyflym.
Wedyn, mae a wnelo'r ail elfen â gwahodd yn hytrach na gorfodi. Daw hyn yn ôl at y syniad o beidio â cheisio cyflwyno fframwaith neu ddull ‘un ateb i bawb’ yn eich sefydliad, ond cynnig elfen o ddewis ynglŷn â'r ffordd y bydd pobl yn newid. Felly, byddwch yn gwahodd pobl i newid. Byddwch yn rhoi opsiynau iddynt, ac ni fyddwch yn dweud wrth bobl beth yn union y bydd angen ei wneud.
Galluogwch bobl i ganfod eu ffordd eu hunain gyda chanllawiau. Bydd pobl yn dysgu mewn ffyrdd gwahanol, a'r hyn a welwn ni yw bod cromlin gwasgariad arloesedd wir yn ddefnyddiol yn hyn o beth. Felly, eich mabwysiadwyr cynnar, yr arloeswyr yn eich sefydliad, fydd y man cychwyn gorau bob amser.
Os byddwch yn meddwl ar raddfa fawr, ond yn dechrau'n fach, dechreuwch gyda'ch arloeswyr. Wedyn, byddwch yn helpu'r arloeswyr hynny i rannu eu straeon ag eraill yn y sefydliad. Byddwch yn gweld y mwyafrif yn dechrau dangos diddordeb pan fydd yr arloeswyr yn creu rhywfaint o dystiolaeth gymdeithasol bod y ffyrdd gwell hyn o weithio yn dechrau eu helpu i gyflawni deilliannau Better Value Sooner Safer Happier.
Fideo 20 Cyflwyniad i Better Value Sooner Safer Happier
Interactive feature not available in single page view (see it in standard view).
Gweithgaredd 20 Dysgu rhagor ynghylch Better Value Sooner Safer Happier
Timing: 10 munud a rhagor o waith opsiynol y tu hwnt i'r cwrs hwn
Darllenwch yr erthygl 'What is BVSSH?’ [Tip: daliwch Ctrl a chliciwch dolen i'w agor mewn tab newydd. (Cuddio tip)] (Smart, 2022) ac yna ewch ar wefan Sooner Safer Happier i ddysgu rhagor ynghylch y dull hwn.
Ystyriwch sut all canolbwyntio ar ganlyniadau helpu gyda datblygu ffyrdd mwy cadarn o weithio. Efallai yr hoffech wneud nodiadau yn y blwch isod.
Interactive feature not available in single page view (see it in standard view).
Os yw hwn yn ddull sydd o ddiddordeb i chi, mae'r tîm Better Values Sooner Safer Happier wedi creu cwrs ar gyfer OpenLearn i ddatblygu'ch dealltwriaeth ymhellach efallai yr hoffech gael sbec arno. Introduction to business agility - OpenLearn - Open University