6.2 Gwerthfawrogi amrywiaeth
Yn eu herthygl 2013, ‘Great leaders who make the mix work’, mae Boris Groysberg, ymchwilydd academaidd, a Katherine Connolly, cymrawd ymchwil yn yr uned ymddygiad sefydliadol yn Ysgol Fusnes Harvard, yn trafod pwysigrwydd amrywiaeth a chynhwysiant.
Eglura Groysberg a Connolly (2013) y dylid ystyried amrywiaeth fel buddsoddiad yn asedau pwysicaf ar fantolen sefydliad: y bobl. Mae amrywiaeth yn ymwneud â buddsoddi ym mhobl. Mae amrywiaeth yn hollbwysig oherwydd ei fod yn caniatáu i sefydliad barhau'n gystadleuol, ceisio'r syniadau a'r datrysiadau gorau posibl, a pharhau i arloesi a thyfu. Yn fwy na hynny, drwy fanteisio ar amrywiaeth, mae gweithwyr yn teimlo eu bod yn cael eu gwerthfawrogi, ac felly'n fwy parod i gefnogi nodau'r sefydliad, gwasanaethu'r 'cwsmeriaid' (myfyrwyr, mewn cyd-destun sefydliad addysg uwch) a gweithio gyda'i gilydd.
Ar yr un pryd, gall amrywiaeth greu anghytundeb a herio ffordd o feddwl pobl, gan eu harwain at ymholiad dwfn neu dorri tir newydd.
Yn y fideo isod, mae cyfranwyr yn trafod sut i werthfawrogi amrywiaeth a chreu gweithleoedd mwy cynhwysol.
Transcript
Gweithgaredd 13 Amrywiaeth yn eich gweithle
Gwyliwch a gwrandewch ar y fideos a sain canlynol lle mae cyfranwyr yn rhannu eu profiadau o amrywiaeth yn y gweithle.
Transcript
Transcript
Transcript
Ystyriwch eich amgylchedd gwaith presennol (neu flaenorol) a rhestrwch rai enghreifftiau o'r amrywiaeth ymhlith gweithwyr neu fyfyrwyr (neu 'gwsmeriaid' eraill).
Trafodaeth
Sut aeth y dasg? Nid oes atebion cywir nac anghywir, ond mae'n bosibl bod eich rhestr yn cynnwys rhai o'r categorïau hyn, neu'r cwbl (Ahmed, 2018):
- hil ac ethnigrwydd
- oedran a chenhedlaeth
- rhywedd a hunaniaeth rhywedd
- cyfeiriadedd rhywiol
- credoau crefyddol ac ysbrydol
- anabledd a gallu
- statws a chefndir economaidd-gymdeithasol
- ffordd o feddwl a phersonoliaeth
- profiad bywyd personol.
Er efallai na wnaethoch feddwl am y ddau gategori olaf, mae'r amrywiaeth maen nhw'n ei chyflwyno i'r gweithle yn gallu achosi heriau. Er enghraifft, disgrifia Ahmed y posibilrwydd o dîm yn cynnwys personoliaethau mewnblyg yn ei chael hi'n anodd rhoi cyflwyniad misol. Awgryma hefyd y gall profiadau bywyd rhywun sydd wedi gwasanaethu yn y lluoedd arfog gyflwyno problemau penodol i'r gweithle.
Drwy ennill dealltwriaeth o'r amrywiaeth hon, dylai eich helpu chi i adnabod nifer o achlysuron pan ydych wedi cael profiad o beth lefel o amrywiaeth yn y gwaith a'r tu hwnt i'r gwaith.