8.4 Ar y diwrnod
Pethau i'w cofio:
- Peidiwch ag ysmygu cyn mynd i mewn i'r cyfweliad.
- Peidiwch â gorlwytho'ch hun â bagiau, papurau neu ymbaréls.
- Cyrhaeddwch mewn da bryd fel eich bod yn cael amser i ymlacio.
- Os bydd unrhyw oedi, ffoniwch.
- Cofiwch fod angen i chi ddangos eich bod yn berson pwyllog a hyderus o'r cychwyn cyntaf.
- Gwrandewch yn ofalus ac yn astud ar y cwestiynau; gofynnwch i'r cyfwelydd ailadrodd neu egluro cwestiwn os nad ydych yn ei ddeall.
- Cofiwch fynd â chopi o'ch cais gyda chi.
- Peidiwch ag anghofio diffodd eich ffôn symudol.
Sut rydych yn swnio
- Swniwch fel pe bai gennych hyder ynoch chi eich hun.
- Siaradwch yn glir. Peidiwch â gostwng eich llais tuag at ddiwedd brawddegau a pheidiwch â mwmian na siarad yn rhy gyflym.
- Defnyddiwch iaith syml – ni ddylai ddrysu'r cyfwelydd na gwyro oddi wrth y cwestiwn. Ceisiwch osgoi defnyddio jargon neu ystrydebau.
- Siaradwch yn gryno, byddwch yn benodol, a phenderfynwch pryd rydych wedi dweud digon. Gwyliwch ymddygiad y cyfwelydd, a fydd yn rhoi cliwiau i chi ynghylch p'un a ydych yn ateb y cwestiynau ac yn amseru eich atebion yn briodol. Os nad ydych yn siŵr, gofynnwch 'Hoffech chi i fi gario ymlaen?'
- Defnyddiwch eich atebion i ddangos eich bod wedi gwneud ymchwil i'r cwmni ac wedi teilwra eich atebion yn unol â hynny.
- Peidiwch â chyfyngu'r hyn rydych yn ei ddweud i'r hyn y maent eisiau ei glywed.
- Sicrhewch eich bod yn ateb y cwestiwn sy'n cael ei ofyn.
- Sicrhewch eich bod yn cyfleu'r cydbwysedd cywir o frwdfrydedd, cynhesrwydd, cyfeillgarwch a diffuantrwydd. Gwenwch!
- Ceisiwch osgoi datganiadau negyddol.
Iaith y corff
- Cerddwch ac eisteddwch gydag osgo da.
- Ysgwydwch ddwylo'n gadarn am gyfnod byr. Mae angen i rai pobl ymarfer gwneud hyn.
- Defnyddiwch eich ystumiau naturiol – does dim angen i chi edrych fel pe baech wedi rhewi.
- Ceisiwch osgoi aflonyddu a chadwch eich dwylo i ffwrdd oddi wrth eich ceg.
- Peidiwch â chroesi eich dwylo.
- Sicrhewch eich bod yn cynnal cyswllt llygad da gyda'r person rydych yn siarad ag ef.