ပထမသီတင်းပတ် - အွန်လိုင်းမှ သင်ယူသူတစ်ဦးဆိုသည်မှာ

မိတ်ဆက်

အွန်လိုင်းမှ သင်ယူမှုကိုစတင်လိုက်ပါသင်တန်းမှ ကြိုဆိုပါသည်။ ယခု ၆ နာရီစာ သင်တန်းသည် ဘဝ၏ အခြားအခန်းကဏ္ဍများကို ရပ်တန့်ထားရန်မလိုဘဲ အွန်လိုင်းတွင် မည်သို့သင်ယူလေ့လာနိုင်သည်ကို ရှင်းပြရန် ရည်ရွယ်ပါသည်။ သင်တန်းတွင် အွန်လိုင်းမှ သင်ယူလေ့လာမှုအကြောင်း သင်ခန်းစာများနှင့် ဗီဒီယိုများပါဝင်ပါသည်။

ပထမရက်သတ္တပတ်တွင် ပုံစံတကျ မဟုတ်သော်လည်း မိမိက အွန်လိုင်းမှလေ့လာသူတစ်ယောက် ဖြစ်နေပြီးပြီဆိုသည့် အတိုင်းအတာကို စဉ်းစားကြည့်မှာဖြစ်ပါသည်။ ထို့နောက် မိမိ၏ ပုံစံတကျမဟုတ်သော လေ့လာမှု အတွေ့အကြုံများက အွန်လိုင်းမှ ပုံစံတကျလေ့လာမှုအတွက် မည်သို့မည်ပုံ စတင်စေနိုင်သည်ဆိုတာကို စဉ်းစားကြည့်မှာဖြစ်ပါသည်။

နောက်ဆုံးအနေဖြင့် မည်သည့်တက္ကသိုလ်တွင်မဆို တက်ရောက်သင်ယူသူတစ်ဦးက လုပ်ဆောင်ရမည့် အွန်လိုင်းလုပ်ဆောင်ချက်တစ်ခုကို လုပ်ရပါမည်။

မစတင်ခင်မှာ ဒီသင်တန်းကို မည်သူက စိတ်ဝင်စားသလဲဆိုသည်ကို ကျွန်တော်တို့ နားလည်သဘောပေါက်နိုင်စေရန်‌ အချိန်အနည်းငယ်ပေးပြီး အောက်ပါ သင်တန်းစတင်မှု စစ်တမ်း  မှ ရိုးရိုးရှင်းရှင်း မေးခွန်း ၃ ခုကို ဖြေပေးမည်ဆိုလျှင် ကျေးဇူးအထူးတင်ရှိပါသည်။ သင်တန်းပြီးသွားလျှင် နောက်ထပ်စစ်တမ်းတစ်ခု ထပ်ဖြည့်ရပါမည်။ ထိုစစ်တမ်းကိုဖြည့်ပြီးမှသာ သင်တန်းတက်ရောက်ပြီးဆုံးကြောင်းလက်မှတ်ကို ထုတ်ပေးမှာဖြစ်ပါသည်။ သင့်ဖြည့်စွက်ချက်များက အွန်လိုင်းသင်ယူမှုအတွေ့အကြုံ ပိုမိုကောင်းမွန်လာအောင် အထောက်အကူပြုမှာ ဖြစ်ပါသည်။

၁ . ၁ အွန်လိုင်းတွင် ရှင်သန်နေထိုင်ခြင်း

အွန်လိုင်းမှ အစားအသောက်များ ပို့ဆောင်ပေးသည့် ဝန်ဆောင်မှုများဖြစ်သော Food Panda နှင့် Grab တို့မှ အစားအသောက်များ မှာယူသည်ဖြစ်စေ ၊ အားလပ်ရက် အပန်းဖြေခရီး စီစဉ်သည်ဖြစ်စေ၊ အာမခံကြေးများ နှိုင်းယှဉ်ကြည့်ခြင်းဖြစ်စေ အွန်လိုင်းတွင် လုပ်၍မရသည်က ပိုပို၍ နည်းလာပုံရပါသည်။

ယူကေတွင် လူတိုင်းအင်တာနက်သုံးသည်ဟု လွယ်လွယ်ယူဆနိုင်ပါသည်။ သို့သော် အမျိုးသား စာရင်းအချက်အလက်ရုံး (the Office for National Statistics (ONS)) ၏ ၂၀၁၅ ခုနှစ်အစီရင်ခံစာ က ထိုသို့မဟုတ်ကြောင်း ညွှန်ပြနေပါသည်။

မြန်မာနိုင်ငံတွင် ၂၀၁၀ ခုနှစ်က အင်တာနက်အသုံးပြုသူဦးရေမှာ စုစုပေါင်းလူဦးရေ၏ ၀.၃ % ထက်လျော့နည်းပြီး အသုံးပြုသူ ၁၃၀၀၀၀ မျှသာ ရှိပါသည်။ ၂၀၁၉ ခုနှစ်တွင်မူ အဆိုပါအရေအတွက်မှ အင်တာနက်အသုံးပြုသူ ၂၁ သန်းအထိ တိုးပွားလာကြောင်း Hootsuite က အစီရင်ခံထုတ်ပြန်ပါသည်။ ၉ နှစ်အတွင်း အဆ ၂၀၀ တိုးပွားနှုန်း ဖြစ်ပါသည်။ ၎င်းအရေအတွက်သည် ဆက်လက်တိုးပွားနေဦးမည်ဟု မျှော်လင့်ထားပါသည်။

အောက်ပါ လုပ်ဆောင်မှုကို လုပ်ကြည့်ပါက ယူကေတွင် အင်တာနက်အသုံးပြုမှုအကြောင်း စဉ်းစားစေပါလိမ့်မည်။ ONS စစ်တမ်းက တွေ့ရှိသည်ဟု မိမိယူဆသည့် အနီးစပ်ဆုံးရာခိုင်နှုန်းကို ရွေးချယ်ပြီး အောက်ပါမေးခွန်းများကို ဖြေဆိုကြည့်ပါ။

၁.၁.၁ သင်ရော အင်တာနက်ပေါ်မှာ ဘာလုပ်သလဲ?

လုပ်ဆောင်မှု ၁ မှ စာရင်းအချက်အလက်များတွင် အင်တာနက်အသုံးပြုသူ အများစုသည် မိုဘိုင်းဖုန်းများမှတဆင့် အင်တာနက်ကို အသုံးပြုနေကြသည်ဆိုသော မြန်မာနိုင်ငံ၏ စိတ်ဝင်စားဖွယ် အင်တာနက်အသုံးပြုမှုပုံစံကို ဖော်ပြထားသည်။ ၎င်းတို့ အင်တာနက်အသုံးပြုသည့်အခါ မည်သည့်အရာများကို ပြုလုပ်ကြသနည်းဟု ကျွန်တော်တို့ နားလည်ရန် လိုအပ်လာပါသည်။ ယင်းမေးခွန်းအတွက် မြန်မာနိုင်ငံနှင်ဆိုင်သော အချက်အလက်များ ကျွန်တော်တို့တွင် မရှိသေးပါ။ သို့သော် ဥပမာအားဖြင့် ပုံ - ၁ တွင် ယူကေနိုင်ငံတွင် အင်တာနက်အသုံးပြုနေချိန် လုပ်ဆောင်မှုများနှင့် ယင်းလုပ်ဆောင်မှုများ ၂၀၀၇ နှင့် ၂၀၁၄ တွင် မည်သို့ ပြောင်းလဲသွားသည်ကို ဖော်ပြထားပါသည်။

ပုံ - ၁ အိမ်ထောင်စု အင်တာနက်အသုံးပြုမှုများ

Show description|Hide description

၂၀၀၇ နှင့် ၂၀၁၄ တွင် အမျိုးမျိုးသော အိမ်ထောင်စု အင်တာနက် အသုံးပြုမှုများ၏ ရာခိုင်နှုန်းကို နှိုင်းယှဉ်ဖော်ပြထားသည့် ဇယားကို ပုံ -၁ တွင် ပြထားသည်။ ၂၀၀၇ မှ ၂၀၁၄ ခုနှစ်အတွင်း ဗီဒီယိုဂိမ်း ကစားခြင်းများ၊ ပုံများ ၊ ရုပ်ရှင်များ နှင့် သီချင်းများကို ကြည့်ရှုခြင်း ဒေါင်းလုဒ်ခြင်းများ ပြုလုပ်သည့် ရာခိုင်နှုန်းသည် ၂၄ % မှ ၄၄ % အထိ၊ အင်တာနက်မှ ဘဏ်ကိစ္စဆောင်ရွက်ခြင်းက ၃၀ % မှ ၅၃ % အထိ၊ ခရီးသွားလာခြင်း သို့မဟုတ် ခရီးစဉ်နေရာထိုင်ခင်းနှင့် ဆက်စပ်သည့် အင်တာနက်ပေါ်မှ ဝန်ဆောင်မှုများကို အသုံးပြုခြင်းက ၄၂ % မှ ၄၃ % အထိ၊ အင်တာနက်မှ သတင်း၊ သတင်းစာနှင့် မဂ္ဂဇင်းများ ဖတ်ခြင်းနှင့် ဒေါင်းလုဒ်ရယူခြင်း ပြုလုပ်ခြင်းက ၂၀ % မှ ၅၅ %အထိ ၊ ကုန်ပစ္စည်းနှင့် ဝန်ဆောင်မှုများအတွက် အချက်အလက်ရှာဖွေခြင်း ၅၈ % မှ ၇၃ % အထိ၊ အီးမေးလ်များ ပေးပို့လက်ခံခြင်း ၅၇ % မှ ၇၅ % အထိ အသီးသီးစီ တိုးပွားလာခဲ့ပါသည်။

အိမ်ထောင်စု အင်တာနက်အသုံးပြုမှုများ

လေ့ကျင့်ခန်း	၂၀၀၇	၂၀၁၄
ဗီဒီယိုဂိမ်း ကစားခြင်းများ၊ ပုံများ၊ ရုပ်ရှင်နှင့် သီချင်းများ ဖွင့်ကြည့်ခြင်းနှင့် ဒေါင်းလုဒ်ရယူခြင်း	၂၄	၄၄
အင်တာနက် ဘဏ်လုပ်ငန်းဆောင်ရွက်မှု	၃၀	၅၃
ခရီးသွားလာခြင်း သို့မဟုတ် ခရီးစဉ်နေရာထိုင်ခင်းနှင့် ဆက်စပ်သည့် အင်တာနက်ပေါ်မှ ဝန်ဆောင်မှုများကို အသုံးပြုခြင်း	၄၂	၄၃
အင်တာနက်မှ သတင်း၊ သတင်းစာနှင့် မဂ္ဂဇင်းများ ဖတ်ခြင်းနှင့် ဒေါင်းလုဒ်ရယူခြင်း	၂၀	၅၅
ကုန်ပစ္စည်းနှင့် ဝန်ဆောင်မှုများအတွက် အချက်အလက်ရှာခြင်း	၅၈	၇၃
အီးမေးလ်များ ပေးပို့လက်ခံခြင်း	၅၇	၇၅

ပုံ - ၁ အိမ်ထောင်စု အင်တာနက်အသုံးပြုမှုများ...

၁.၁.၂ အွန်လိုင်းပေါ်တက်ခြင်းမှ အွန်လိုင်းတွင် လေ့လာြခင်းသို့

ပြီးခဲ့သည့် အခန်းတွင် သင်အင်တာနက် အသုံးပြုမှုအကြောင်း စဉ်းစားရန် မေးခဲ့ပါသည်။ စဉ်းစားမိသမျှ အင်တာနက်အသုံးပြုမှု အများစုတွင် လေ့လာသင်ယူမှု တစ်ခုမဟုတ်တစ်ခု ပါနေမည်သာဖြစ်သည်။ ဥပမာ အားလပ်ရက် ခရီးတစ်ခုအတွက် အွန်လိုင်းမှတဆင့် ကြိုတင်စီစဉ်မည်ဆိုလျှင် အောက်တွင် ဖော်ြပထားသည်များကို လုပ်ဆောင်ရန် တတ်မြောက်ပြီးသား ကျွမ်းကျင်မှုများကို အသုံးပြုလိုက်တာ ဖြစ်နိုင်ပါသည်။ -

• ခရီးသွားလိုသော ရက်များအတွက် သွားရမည့်နေရာများကို ရှာဖွေခြင်း
• ဟိုတယ်များ၏ ဝန်ဆောင်မှုအပေါ် မှတ်ချက်များကို ယုံသင့်၊ မယုံသင့် သုံးသပ်ခြင်း
• စျေးနှုန်းအသက်သာဆုံး လေယာဉ်များနှင့် ဟိုတယ်များကို လိုက်ရှာခြင်း
• မြေပုံများကို မိမိ၏ စမတ်လက်ကိုင်ဖုန်းအတွင်း ကြိုတင်ဒေါင်းလုဒ်ယူထားခြင်း

မိမိ၏ အွန်လိုင်းလေ့လာသင်ယူမှု အတွေ့အကြုံများ

မိမိသည် အွန်လိုင်းပေါ်တွင် လေ့လာသူတစ်ယောက်ဖြစ်သည် ဆိုသည်ကို သဘောတူမည်ဟု မျှော်လင့်ပါသည်။ လေ့လာသင်ယူသူတစ်ယောက် မဟုတ်ဘဲ အွန်လိုင်းတက်သုံးရန် မဖြစ်နိုင်သောကြောင့် ဖြစ်ပါသည်။

 အခန်း ၁.၁.၁တွင် အွန်လိုင်းတွင် မိမိလုပ်ဆောင်မှုများ၏ အကြောင်းကို စဉ်းစားခဲ့ပြီဖြစ်သည်။ ပြီးခဲ့သည့်အခန်းမှာ ပါဝင်ခဲ့သည့် အင်တာနက် လုပ်ဆောင်မှုများမှ တစ်ခုကိုအသုံးပြု၍ အောက်ပါမေးခွန်းများကို ဖြေဆိုပါ။

• ဘာလုပ်ခဲ့ပါသလဲ?
• ဘာကြောင့် လုပ်ပါသလဲ?
• ဘာတွေ လေ့လာခဲ့လဲ?
• အဲဒါနှင့်ဆက်စပ်ပြီး တခြားဘာဆက်လုပ်ဖြစ်သွားလဲ?
• ဘာကျွမ်းကျင်မှုရခဲ့သလဲ?

အောက်ပါ ဇယား ၁ တွင် နမူနာတစ်ခုကို ဖော်ပြပေးထားပါသည်။

အချိန်ရမယ်ဆိုရင် နောက်ထပ် နမူနာတစ်ခုခုအတွက် ဒီလေ့ကျင့်ခန်းကို ထပ်လုပ်ကြည့်ပါ။

ဒီတော့ အွန်လိုင်းလေ့လာမှုနဲ့ ပတ်သက်လို့ ဒါကဘာတွေပြောသလဲ။ အွန်လိုင်းပေါ်မှာ အမျိုးမျိုးအဖုံဖုံ လုပ်ကိုင်ဆောင်ရွက်ခဲ့တယ် ဆိုတာကို သိရလို့ အံ့သြသွားမှာ ဖြစ်ပါတယ်။ ဒါမှမဟုတ် လေ့လာသင်ယူမှု ရှုထောင့်ကနေ ကြည့်ရလို့ အံသြသွားမှာပါ။ အံ့သြသွားတယ်ဆိုရင် ကျွန်တော်တို့ဟာ အမြဲလေ့လာသင်ယူနေတယ် ဆိုတာကို အမှတ်ရပါ။ ကျွန်တော်တို့ရဲ့ မျက်စိရှေ့မှောက်က ကမ္ဘာကြီးကိုနားလည်ဖို့ တစ်ခုတည်းသောနည်းလမ်း ဖြစ်ပါတယ်။ အဲဒီကမ္ဘာကြီးမှာ အင်တာနက်က ပိုပိုပြီးတော့ အရေးပါတဲ့အခန်းကနေ ပါဝင်နေပါတယ်။

၁.၁.၃ ပုံစံတကျနှင့် ပုံစံတတကျ မဟုတ်သော အနေအထားအမျိုးမျိုး

အွန်လိုင်းပေါ်တွင် အချိန်အများကြီး အသုံးပြုနေသည် ဆိုလျှင်ပင် ယင်းလေ့လာချိန်အများစုဟာ ပုံစံတကျမဟုတ်သော အလွတ်သဘော လေ့လာမှုများသာ ဖြစ်နိုင်ပါသည်။

ပုံစံတကျ မဟုတ်သော လေ့လာမှုသည် နေ့စဉ်ဘဝတွင် ပြုလုပ်နေသောလေ့လာမှု ဖြစ်ပါသည်။ ဥပမာ ဟင်းသီးဟင်းရွက်ပင်များ စိုက်ပျိုးချင်သည် ဆိုကြပါစို့။ ပျိုးပင်ပေါက်များ ဝယ်ယူနိုင်သည့် နေရာများကို စတင်ရှာဖွေရမည်၊ ဆောင်းပါးများဖတ်ရမည်၊ အပင်စိုက်နည်း အချက်အလက်များရနိုင်ရန် သက်ဆိုင်ရာလူမှုကွန်ယက်အဖွဲ့ကို ရှာဖွေပူးပေါင်းရမည်။

မိဘများ သို့မဟုတ် ကလေးထိန်းများအနေဖြင့် ကလေးငယ်များကို စာလုံးအမျိုးမျိုးရေးသားနည်း သို့မဟုတ် ဖိနပ်ကြိုးစည်းနည်းတို့ကို သင်ပြပေးရသည်များ ရှိလာတတ်ပါသည်။ ( Jeffs and Smith, 1997, 2005, 2012ကို မှီငြမ်းသည်) ထို့ကြောင့် အလွတ်သဘော လေ့လာရခြင်းသည် တစ်သက်တာလေ့လာရေးပင် ဖြစ်ပါသည်။ ထိုတစ်သက်တာဖြစ်စဉ်တွင် လေ့လာသင်ယူသူတို့သည် စိတ်နေသဘောထားများ၊ တန်ဖိုးများ၊ ကျွမ်းကျင်မှုနှင့် အသိပညာများကို နေ့စဉ်အတွေ့အကြုံများမှတဆင့် ရရှိကြသည်။ ( Conner, 1997–2013မှ မှီငြမ်းသည်) ယင်းကို ပြီးခဲ့သည့်အခန်းတွင် တွေ့မြင်ခဲ့ရပြီဖြစ်ပါသည်။

ပုံစံတကျ လေ့လာခြင်းဆိုသည်မှာ အဆင့်ဆင့် စီစဉ်ထားသော ကျောင်းပညာရေးစနစ်များကို ရည်ညွှန်းပါသည်။ မူလတန်းမှစ၍ တက္ကသိုလ်များအထိ ပါဝင်သည့်အပြင် လုပ်ငန်းခွင်အတွင်း ပညာရပ်ပိုင်း သို့မဟုတ် ကျွမ်းကျင်မှုအတတ်ပညာဆိုင်ရာ သင်တန်းပေးခြင်းအတွက် ကျောင်းစနစ်ကဲ့သို့ သင်ကြားပေးမှု အစီအစဉ်များအားလုံး ပါဝင်ပါသည်။ Conner, 1997–2013မှ မှီငြမ်းသည်)။ ထို့ကြောင့် ယဆရာများ၊ ပို့ချသူကထိကများဖြစ်သည့် အခြားသူများက စီစဉ်၊ ပို့ချခြင်းဖြစ်သောကြောင့် လေ့လာသူတစ်ဦးချင်းက အနည်းငယ်မျှသာ လွှမ်းမိုးနိုင်သော လေ့လာသင်ယူမှု ဖြစ်ပါသည်။

လက်တွေ့တွင် ပုံစံတကျမဟုတ်သော လေ့လာသင်ယူမှုနှင့် ပုံစံတကျ လေ့လာသင်ယူမှုတို့၏ ကွဲပြားခြားနားမှုမှာ အစကထင်ရသလောက် တင်းတင်းကြပ်ကြပ် မရှိပါ။ ယခု မိမိတက်ရောက်သင်ယူနေသော ဤသင်တန်းပုံစံကို နမူနာလေ့လာကြည့်ပါ။

ပညာသင်ကြားသူများက စီစဉ်ရေးဆွဲထားပြီး အတော်ပင် ပုံစံတကျရှိသည့် အွန်လိုင်းပတ်ဝန်းကျင်တစ်ခုဖြင့် ပို့ချနေခြင်းဖြစ်ပါသည်။ သို့သော် ပုံစံတကျ လေ့လာမှုပုံစံတွင် ပြုလုပ်၍မရနိုင်သော လေ့လာသင်ယူသူက လွတ်လပ်စွာ ဝင်လေ့လာနိုင်ခြင်းနှင့် ပြန်ထွက်သွားနိုင်ခြင်းတို့ကို ပြုလုပ်နိုင်ပေသည်။

ယခုသင်တန်းကို တက်ထားကြောင်း အသိအမှတ်ပြုမှုကို ရရှိနိုင်သော်လည်း ယခုသင်တန်းသည် ပုံစံတကျပို့ချမှု မဟုတ်၍ မည်မျှအားစိုက်ရမည်ကို ကိုယ်တိုင် ဆုံးဖြတ်ရမည်ဖြစ်သည်။ သို့ဖြစ်၍ ပုံစံတကျလေ့လာမှုနှင့် ပုံစံတကျမဟုတ်သော လေ့လာမှုပုံစံများကို တစ်ခုနှင့်တစ်ခု မသိမသာကွဲပြားနေ‌သော ဖြစ်စဉ်တစ်ခု၏ အစိတ်အပိုင်းအဖြစ် ရှုမြင်ခြင်းသည်သာ အကောင်းဆုံးဖြစ်ပါသည်။

ယခင်က လေ့လာသင်ယူမှု အတွေ့အကြုံကို ပြန်စဉ်းစားပြီး ထိုလေ့လာမှုများသည် မည်ရွေ့မည်မျှ ပုံစံတကျ မဟုတ်သော သို့မဟုတ် ပုံစံတကျ လေ့လာမှုများ ဖြစ်သလဲဆိုသည်ကို တွေးကြည့်ပါ။ မိမိအတွေ့အကြုံသည် ပုံ - ၂ တွင် ပြထားသော ဖော်ပြချက် ၂ ခုထဲမှ တစ်ခုနှင့် အတိအကျ ကိုက်ညီမှုရှိပါသလား။ သို့မဟုတ် နှစ်ခုစလုံးထဲတွင် ပါဝင်နေပါသလား။

ပုံ - ၂ အွန်လိုင်းမှ သင်ကြားမှုကို စတင်လိုက်ပါ

Show description|Hide description

ပုံ - ၂ တွင် ပုံစံတကျ မဟုတ်သော လေ့လာမှုနှင့် ပုံစံတကျ လေ့လာမှု ပုံစံနှစ်မျိုးကို ပြထားသည်။ ပုံစံတကျ လေ့လာမှုပုံစံဘက်ခြမ်းတွင် ပညာရေးအဖွဲ့အစည်းတစ်ခုမှ သတ်မှတ်ထားသော ပုံစံတကျလေ့လာမှုဖြစ်ပြီး အတိအကျရှိသော သင်ရိုးညွှန်းတမ်းတစ်စုံ၊ ပုံသေအချိန်ဇယားတစ်ခုနှင့် အကဲဖြတ်မှုများ ပါဝင်သည်။ ပုံစံတကျ မဟုတ်သော လေ့လာမှုပုံစံဘက်ခြမ်းတွင် တစ်ဦးချင်းစီ သို့မဟုတ် အုပ်စုလိုက် သတ်မှတ်ထားခြင်းဖြစ်ပြီး သင်ရိုးညွှန်းတမ်းအတိအကျ မရှိပါ၊ ပုံသေအချိန်ဇယား မရှိပါ။ အကဲဖြတ်မှုများ မပါဝင်ပါ။

ပုံ - ၂ အွန်လိုင်းမှ သင်ကြားမှုကို စတင်လိုက်ပါ...

မိမိ၏ ပုံစံတကျမဟုတ်သော လေ့လာမှုများမှ အချို့သည်ပင် ဖော်ပြပါ ပုံစံတကျနှင့် ပုံစံတကျ မဟုတ်သော အနေအထားအမျိုးမျိုး၏ တစ်နေရာရာတွင် ရှိနေသည်ကို တွေ့ရနိုင်ပါသည်။ လာမည်အခန်းတွင် ပုံစံတကျ အွန်လိုင်းမှ လေ့လာသင်ယူမှုပုံစံအကြောင်းကို ထပ်မံလေ့လာခွင့် ရမည်ဖြစ်သည်။

၁.၂ အွန်လိုင်းလေ့လာသင်ယူမှု၏ အစိတ်အပိုင်းများ

တက္ကသိုလ်တွင် လေ့လာသင်ယူမှုပုံစံများမှ မည်သည့်ပုံစံမဆိုတွင်ရှိသကဲ့သို့ အွန်လိုင်းမှ လေ့လာသင်ယူပုံတွင် အစိတ်အပိုင်း ၃ ပိုင်းရှိပါသည်။

1. သင်ကြားပို့ချမှုဆိုင်ရာ စာအုပ်စာတမ်း၊ အချက်အလက်များ၊ ပစ္စည်းများနှင့် လုပ်ဆောင်မှုများ
2. စစ်ဆေးအကဲဖြတ်ခြင်း
3. မိမိ၏ လေ့လာသင်ယူလိုသည့် အကြောင်းအရင်းများ

သို့သော် အဆိုပါအစိတ်အပိုင်းများကို အကောင်အထည်ဖော်မှုက ပုံမှန်တက္ကသိုလ်တစ်ခုတွင် ကြုံတွေ့နိုင်သည်နှင့် ကွဲပြားနေမည်ဖြစ်ပါသည်။

၁.၂.၁ အွန်လိုင်းမှ သင်ကြားပို့ချမှုဆိုင်ရာ စာအုပ်စာတမ်း၊ အချက်အလက်များနှင့်ပစ္စည်းများ

တက္ကသိုလ်များအားလုံးတွင် အွန်လိုင်းဖြစ်စေ၊ တက္ကသိုလ်ပရဝုဏ်၌ဖြစ်စေ သင်ယူရေး၊ သင်ကြားရေး အထောက်အကူများကို အွန်လိုင်းမှတဆင့် ကျောင်းသားများအားလုံးအတွက် ပံ့ပိုးပေးရသည်။ ဥပမာအားဖြင့် အွန်လိုင်းသင်ယူလေ့လာရေး ပတ်ဝန်းကျင် သို့မဟုတ် သင်ယူမှုဆိုင်ရာ စီမံခန့်ခွဲမှုစနစ်မှတဆင့် ပံ့ပိုးရသည်။ အွန်လိုင်းတက္ကသိုလ်များနှင့် ခြားနားချက်မှာ အဆိုပါအွန်လိုင်း အထောက်အကူများက မိမိ၏လေ့လာမှုများအတွက် အဓိက အလေးထားစရာ ဖြစ်လာြခင်းပင် ဖြစ်သည်။ မိမိတက်ရောက်နေသော သင်တန်းအတွက် အဓိကလေ့လာစရာများသည် အင်တာနက်ပေါ်တွင်ရှိနေမည် ဖြစ်ပါသည်။ သင်တန်း စာအုပ်စာတမ်းများ၊ အချက်အလက်များကို မိမိ၏စမတ်ဖုန်းနှင့် တက်ဘလက်များတွင်သာမက လက်ပ်တော့ သို့မဟုတ် PC ကွန်ပျူတာများတွင်ပါ တက်ရောက်ကြည့်ရှုနိုင်ရမည်။ သို့မှသာ မိမိက မည်သည့်နေရာတွင်ရှိသည်ဖြစ်စေ သင်တန်းတက်ရန် ပိုမိုလွယ်ကူမည်ဖြစ်ပါသည်။

အောက်ပါတို့မှာ သွားရောက်လေ့လာကြည့်သင့်သော အင်တာနက်စာကြည့်တိုက်အချို့ဖြစ်ပါသည်။

• Ministry of Education Student & Teacher e-Library
• Burma/ Myanmar library
• ပညာရေးဝန်ကြီးဌာန Online Library

ထို့အပြင် အွန်လိုင်းရေဒီယိုဖိုင်များ ၊ ဗီဒီယိုများ၊ ကွန်ပျူတာဆော့ဖ်ဝဲများ နှင့် အပြန်အလှန်လုပ်ဆောင်နိုင်သည့် သင်ထောက်ကူများကိုလည်း အသုံးပြုခွင့်ရှိမည်။ သင်တန်းအများအပြားတွင် သီးသန့်ဝက်ဘ်ဆိုက်ကိုယ်စီ ရှိထားကြပါသည်။ ဖိုရမ်များ၊ အီးမေးလ်နှင့် အွန်လိုင်းရုပ်သံခေါ်ဆိုမှုများ မှတဆင့် မိမိ၏ သင်တန်းဆရာအပြင် အခြားကျောင်းသားများနှင့်ပါ ဆက်သွယ်နိုင်မည်ဖြစ်သည်။ အွန်လိုင်းစာကြည့်တိုက်များတွင် ထောင်နှင့်ချီသော အွန်လိုင်းဂျာနယ်များ၊ အီလက်ထရောနစ်စာအုပ်များ၊ ဒေတာဘေ့စ်များနှင့် မာလ်တီမီဒီယာ အရင်းအမြစ်များကို တစ်ရက်လျှင် ၂၄ နာရီ၊ တစ်ပတ်လျှင် ၇ ရက် လိုအပ်သည့်အချိန် လိုအပ်သည့်နေရာတွင် ရယူလေ့လာနိုင်သည်။

အင်တာနက်ပေါ်တွင် မိမိသတင်းအချက်အလက် ရှာဖွေအသုံးပြုပုံနှင့် လုပ်ဆောင်ဖူးသော သင်ယူလေ့လာမှုအကြောင်း ပြန်စဉ်းစားကြည့်ပါ။ အွန်လိုင်းတွင် အချက်အလက်မည်မျှ ဖတ်သလဲ။ မိတ်ဆွေသူငယ်ချင်းများနှင့် မည်သို့ ဆက်သွယ်ပါသလဲ။ အွန်လိုင်းတွင် ပုံစံတကျ သင်ယူလေ့လာသည့်အခါ မိမိကိုသုံးခွင့်ပေးထားသော သင်ထောက်ကူများကို အကောင်းဆုံးမည်သို့ အသုံးချမည်၊ သတင်းအချက်အလက် မည်သို့ရှာဖွေမည်နှင့် အခြားသူများကို မည်သို့ ဆက်သွယ်ပြောဆိုမည်တို့ကို စဉ်းစားထားဖို့လိုအပ်ပါသည်။ ပုံစံတကျ အွန်လိုင်းလေ့လာမှုနှင့် သက်ဆိုင်သည့် အောက်ပါနမူနာများကို ကြည့်ပါ။ မည်သည့်စက်ပစ္စည်းအမျိုးအစား (လက်ပ်တော့/ကွန်ပျူတာ ၊ တက်ဘလက် ၊ စမတ်ဖုန်း) သည် မိမိပြုလုပ်မည့် လေ့လာမှုအတွက် အသင့်တော်ဆုံး ဖြစ်မည်နည်း။

• သင်ထောက်ကူများကို ဖတ်ရှုအသုံးပြုခြင်း
• ဂျာနယ်ဆောင်းပါးတစ်ပုဒ် ဖတ်ခြင်း
• အဓိပ္ပာယ်ဖွင့်ဆိုချက်များနှင့် ပညာရပ်ဆိုင်ရာ အသုံးအနှုန်းများအား ရှာဖွေကြည့်ရှုခြင်း
• သင်တန်းအချိန်ဇယားအတိုင်းမီအောင် လေ့လာခြင်း
• အွန်လိုင်းတွင် အခြားကျောင်းသားကျောင်းသူများနှင့် ဆက်သွယ်ပြောဆိုခြင်း
• မိမိ၏ သင်တန်းဆရာအား ဆက်သွယ်ခြင်း
• အွန်လိုင်းသင်ခန်းစာတစ်ခုတွင် မိမိစိတ်ကူးများကို တင်ပြခြင်း

၁.၂.၂ အွန်လိုင်းမှ စစ်ဆေးအကဲဖြတ်ခြင်း

တရားဝင်အသိအမှတ်ပြု သင်တန်းများအားလုံးတွင် စစ်ဆေးအကဲဖြတ်မှုနှင့် အွန်လိုင်းလေ့လာမှုတို့ မရှိမဖြစ် လိုအပ်ပါသည်။ စစ်ဆေးအကဲဖြတ်မှုသည် သင်တန်းပို့ချမှုကို မိမိအနေဖြင့် မည်မျှနားလည်သဘောပေါက်သည်ကို မိမိနှင့်သင်တန်းဆရာ သိရှိနိုင်စေမည့် အခွင့်အရေးကို ရရှိစေသည်။ ထို့အပြင် တက္ကသိုလ်အဆင့် သင်တန်းတစ်ခုကို အောင်မြင်ရန် လိုအပ်သော အသိပညာနှင့် နားလည်သဘောပေါက်မှု မိမိတွင်ရှိနေပြီ ဖြစ်ကြောင်းလည်း ဖော်ပြနိုင်စေသည်။

အင်တာနက်မှတဆင့် စစ်ဆေးအကဲဖြတ်မှုတွင် အဓိကပုံစံ ၂ မျိုး ရှိပါသည်။ သင်တန်းတစ်လျှောက် မိမိ၏သိနားလည်မှုကို စစ်ဆေးနိုင်မည့် အွန်လိုင်းမေးခွန်းများကဲ့သို့ မေးခွန်းတိုများနှင့် သင်တန်းဆရာ သို့မဟုတ် ဆရာ၊ဆရာမဆီသို့ အီလက်ထရောနစ်နည်းဖြင့် တင်သွင်းရသော လုပ်ဆောင်ရန်ပေးထားသည့် မေးခွန်းရှည်များ ဖြစ်ကြသည်။ စစ်ဆေးအကဲဖြတ်မှုများအတွက် အဓိကအချက်မှာ မိမိလုပ်ဆောင်ရန် ပေးထားသည့် အလုပ်ဆိုင်ရာစာအုပ်များတွင် အလေးထားရမည့် လမ်းညွှန်ချက်များ ပါဝင်ရန်ဖြစ်ပြီး သင်တန်းဆရာကလည်း ထိုလမ်းညွှန်ချက်များကို ထပ်မံအလေးထားနိုင်ခြင်းပင် ဖြစ်သည်။ မိမိအနေဖြင့် အသေးစိတ် အပြုသဘောဆောင်သော မှတ်ချက်များလည်း ရရှိရပါမည်။

စစ်ဆေးအကဲဖြတ်မှု၏ ရည်ရွယ်ချက်မှာ မိမိ၏ အားနည်းချက်များကို ရှာဖွေရန်မဟုတ်ဘဲ မိမိ၏ လေ့လာမှုနှင့် နားလည်သဘောပေါက်မှုကို ခိုင်မာစေမည့် အခွင့်အရေးများ ဆောင်ကျဉ်းပေးရန် ဖြစ်သည်။

အလုပ်တွင် သို့မဟုတ် ယခင်လေ့လာစဉ်က ရရှိခဲ့သော ဝေဖန်အကြံပြုချက်ကို ပြန်စဉ်းစားကြည့်ပါ။

• အကြံပြုချက်ရသည့်အပေါ် သင်မည်မျှ သက်သောင့်သက်သာဖြစ်ပါသလဲ?
• မည်သည့် ဝေဖန်အကြံပြုချက်မျိုးက အသုံးအဝင်ဆုံးဟု ထင်ပါသလဲ?
• မည်သည့် ဝေဖန်အကြံပြုချက်မျိုးက အသုံးဝင်မှုအနည်းဆုံးဟု ထင်ပါသလဲ?
• ဝေဖန်အကြံပြုချက်ကို လက်ခံရရှိသည့်ပုံစံ ( လူချင်းတွေ့ပြီးပြောခြင်း၊ အီလက်ထရောနစ်ပုံစံဖြင့် စသည်ဖြင့်) က သက်ရောက်မှုတစ်ခုခု ရှိစေပါသလား?

၁.၂.၃ ကြောက်စရာ ဘာမှမရှိပါ။

"ကြောက်စရာ" ဟုသုံးခြင်းက ဒီနေရာတွင် အကောင်းဆုံးဖြစ်ချင်မှ ဖြစ်လိမ့်မည်။ တစ်စုံတစ်ခုကို ကြောက်လန့်ခြင်းက ထိုခြောက်လှန့်နေသည့်အရာကို များများပြုလုပ်နိုင်ဖို့ အလွန်ခက်ခဲသွားစေမည်ဖြစ်သည်။

ထို့ကြောင့် အွန်လိုင်းအတွေ့အကြုံနှင့် လေ့လာသင်ယူမှု အတွေ့အကြုံများက မကောင်းခဲ့၍ (ကြောက်နေသည်) ဆိုလျှင်လည်း နားလည်ပေးနိုင်သော ခံစားတုံ့ပြန်ချက်တစ်ခု ဖြစ်ပါသည်။

မည်သည့် လေ့လာမှုပုံစံမဆို (အွန်လိုင်းဖြစ်စေ၊ မည်သည့်ပုံစံနှင့်ဖြစ်စေ)ကို တောင်းဆိုမှုများသည်၊ အားစမ်းမှုများရှိသည်ဟု မြင်ခြင်းက ပိုအကျိုးရှိပါသည်။ ယင်းကို Open University ၏ ဗီဒီယိုအတိုဖြစ်သည့် 'ဘာစွမ်းနိုင်သလဲ?’ တွင် ကောင်းစွာသရုပ်ဖော်ထားပါသည်။ ၂၀၁၅

၁.၂.၄ လေ့လာသင်ယူလိုသည့် အကြောင်းအရင်းများ

သင်တန်း၏ နောက်အခန်းများသို့ ဆက်မသွားခင် မိမိ၏ လေ့လာသင်ယူလိုသည့် အကြောင်းအရင်းများကို စဉ်းစားကြည့်တာ ကောင်းပါသည်။ အဝေးသင်နှင့် နေ့တက်တက္ကသိုလ် နှစ်မျိုးလုံးရှိ ကျောင်းသူကျောင်းသားများတွင် တူညီသော လေ့လာသင်ယူလိုသည့် အကြောင်းအရင်းများ များစွာရှိပါသည်။ သူတို့က အောက်ပါအကြောင်းအရင်းများကြောင့် ပညာရှာတာ ဖြစ်နိုင်သည်။

• အလုပ်အကိုင်အခွင့်အလမ်း တိုးတက်စေရန်
• မိမိစိတ်ဝင်စားသည့်အရာတစ်ခုကို ဆည်းပူးရန်
• အလုပ်အကိုင် အသစ်တစ်ခုအတွက် အသင့်ဖြစ်စေရန်
• မသိသေးသည့် အကြောင်းအရာတစ်ခုကို လေ့လာကြည့်ရန်
• အမြဲလိုချင်ခဲ့သည့် ဘွဲ့၊ အရည်အချင်းအများကို ရယူရန်
• မိမိ၏ အသက်မွေးဝမ်းကြောင်းဖွံ့ဖြိုးမှု ဆက်တိုးတက်စေရန်
• လုပ်နိုင်စွမ်း ရှိ၊ မရှိ သိရန်

အဆိုပါ အကြောင်းအရင်းများထဲမှ မည်သည့်အချက်များက မိမိနှင့်ကိုက်ညီပါသလဲ။ အွန်လိုင်းမှ လေ့လာသင်ယူရန် ထူးထူးခြားခြား အကြောင်းအရင်းတစ်ခု ရှိနေပါသလား။

ပုံ - ၃ လေ့လာသင်ယူမှုအတွက် အကြောင်းအရင်းများ

၁.၃ အွန်လိုင်း လေ့လာမှုဆိုင်ရာ စွမ်းရည်များ

ယခုသီတင်းပတ်၏ ကျန်သည့်ရက်များတွင် တက္ကသိုလ်တွင် အွန်လိုင်းမှ လေ့လာသူတစ်ယောက်အနေဖြင့် လိုအပ်မည့် ကျွမ်းကျင်မှုများကို အမြည်းသဘော သိရှိရမည်။ ယင်းကျွမ်းကျင်မှုများကို တတ်ကျွမ်းထားပါက အခြားသင်တန်းသားများကိုပါ ကူညီပေးနိုင်မည်ဖြစ်သည်။

တက္ကသိုလ်အဆင့် သင်တန်းတစ်ခုတွင် တက်ရောက်လေ့လာမည်ဆိုပါက အမှီအခိုကင်းစွာ သုတေသနပြုလုပ်ရန် လိုမည်ဖြစ်ပြီး သုတေသနရလဒ်များကို ပုံမှန်အားဖြင့် စာစီစာကုံးများ သို့မဟုတ် ရှင်းလင်းတင်ဆက်ပုံများဖြင့် တင်ပြရန်လိုပါသည်။

အင်တာနက်သည် အကြောင်းအရာတစ်ခုအကြောင်း အချက်အလက်ရှာဖွေရန် ကျယ်ပြော၍ အံ့ဖွယ်ကောင်းသော အရင်းအမြစ်တစ်ခုဖြစ်နိုင်ပြီး မိမိက တက္ကသိုလ်တစ်ခုခုတွင် ပုံစံတကျ လေ့လာသင်ယူနေသူဖြစ်လျှင် ယင်းတက္ကသိုလ်မှ လစဉ်ကြေး သို့မဟုတ် နှစ်စဉ်ကြေးပေးသွင်းထားသည့် အင်တာနက်ဂျာနယ် အမျိုးမျိုးကိုပါ ဝင်ရောက်ဖတ်ရှုခွင့် ရနိုင်ပါသည်။

အင်တာနက်သည် သတင်းအချက်အလက်များ ရှာဖွေရာတွင် ညံ့ဖျင်းသည့် အရင်းအမြစ်တစ်ခုလည်း ဖြစ်နေနိုင်ပေသည်။ မည်သူမဆို ဝက်ဘ်ဆိုက်လွှင့်တင်နိုင်ခြင်း သို့မဟုတ် ဘလော့ဂ် ရေးသားလွှင့်တင်နိုင်ခြင်းတို့ကြောင့် ယင်းသို့လွှင့်တင်ထားသည့် အချက်အလက်များ မှန်ကန်မှု ရှိ၊ မရှိအတွက် အာမခံမှုမရှိပါ။

လာမည့်အခန်းတွင် The Open University မှ ခေတ်သစ်ဥရောပသမိုင်း သင်ကြားပို့ချသူ အကြီးတန်းကထိက ဒေါက်တာ အန်နီကာမွန်ဘော်ယာနှင့် ပါရဂူတန်းကျောင်းသား ဗင်းဆင့်ထရော့ထ်တို့ အလုပ်တစ်ခုလုပ်နေသည်ကို ကြည့်ရပါမည်။ အင်တာနက်ပေါ်တွင် အချက်အလက်များရှာဖွေသောအခါ အထောက်အကူဖြစ်စေပါလိမ့်မည်။ ထို့နောက် ကိုယ်တိုင် သုတေသနတချို့ ကြိုးစားလုပ်ကြည့်ရမည် ဖြစ်ပါသည်။

လာမည့်အခန်းကို The Open University ၏ သင်တန်းတစ်ခုဖြစ်သော World War 1: trauma and memory (မကြာခင် လေ့လာနိုင်မည်) ကို မှီငြမ်းထားပါသည်။

၁.၃.၁ သမိုင်းအချက်အလက်များကို ရှာဖွေခြင်းနှင့် ရယူခြင်း

အောက်ပါ ဗီဒီယိုတွင် အန်နီကာနှင့် ဗင်းဆင့်တို့က 'Desk Research' (ထိုင်ရာမထ အင်တာနက်ကိုအသုံးပြုကာ တဆင့်ခံ သတင်းအချက်အလက်များကို ရှာဖွေသည့်အလုပ်)ကို လုပ်ကြတာဖြစ်ပါသည်။ သူတို့အလုပ်မှာ ပထမကမ္ဘာစစ်အတွင်း လူပေါင်းမည်မျှ သေဆုံးခဲ့သလဲဆိုသည်ကို ဖော်ထုတ်ရန်ဖြစ်ပါသည်။

ဗီဒီယိုကြည့်စဉ် အသေအပျောက်နှုန်းနှင့် ပတ်သက်ပြီး မိမိဘာသာ ရှာဖွေနိုင်သော နည်းလမ်းများမှတချို့ကို မှတ်စုထုတ်ထားပါ။ ယင်းသုတေသနကို ပြုလုပ်စဉ် မိမိကြုံတွေ့နိုင်မည့် ပြဿနာအချို့ကို စဉ်းစားကြည့်ပါ။ ကြည့်ပြီးသည့်အခါ ထိုအလုပ်ကို မိမိကိုယ်တိုင်ပြုလုပ်ရမှာ ဖြစ်ပါသည်။ အသေအပျောက် စာရင်းဇယားများကို Brill’s Encyclopedia of the First World War (Hirschfeld et al., 2012) နှင့် The Cambridge History of the First World War (Winter, 2014) တို့မှ ရယူထားပါသည်။

Download this video clip.Video player: ou_futurelearn_cicp_vid_1004.mp4

Show transcript|Hide transcript

Transcript

အန်နီကာ

ဗင်းဆင့်ရေ ဒီနေ့ တို့လုပ်ရမှာက ပထမကမ္ဘာစစ်အတွင်းက လူဘယ်လောက် သေဆုံးခဲ့ရသလဲဆိုတာ သုတေသနလုပ်ရမှာနော်။ အဲဒါက လွယ်တဲ့ကိစ္စတော့မဟုတ်ဘူး။ ဟုတ်တယ်မလား။

ဗင်းဆင့်

မလွယ်ပါဘူး။ ဘာလို့လဲဆိုတော့ အရင်ဆုံးအနေနဲ့ ကျွန်တော်တို့ အသုံးအနှုန်းတွေကို အဓိပ္ပာယ်ဖွင့်တဲ့ ပုံစံနဲ့ပတ်သက်ပြီး သတိထားမှဖြစ်မယ်။ ကျွန်တော်တို့အခု သေကြေဒဏ်ရာရမှု စာရင်းဇယားတွေအကြောင်း ပြောနေတာ ဒါပေမဲ့ သေကြေဒဏ်ရာရမှုတွေဆိုတာက စစ်အတွင်း သေဆုံးသွားသူတွေချည်းပဲလို့ မဆိုလိုဘူး။ တိုက်ပွဲဝင်ဖို့မသင့်တဲ့ လူတွေအားလုံးကိုပြောတာဆိုတော့ ဒဏ်ရာရသူတွေ။ သုံ့ပန်းအဖြစ်ပါသွားသူတွေနဲ့ ပျောက်ဆုံးသွားတဲ့သူတွေကိုပါ ထည့်တွက်ဖို့လိုပါတယ်။ ဒီတော့ သေကြေဒဏ်ရာရမှုနဲ့ သေဆုံးမှူကို ရောထွေးမသွားအောင် ကျွန်တော်တို့ သတိထားဖို့လိုတယ်ဗျ။

အန်နီကာ

မင်းပြောတာက စစ်ဖက် သေကြေဒဏ်ရာရမှုတွေကို ပြောနေတာဆိုတော့ အရပ်သား သေကြေဒဏ်ရာရမှုတွေကရော။ အခုတို့မှာရှိတဲ့ စာရင်းဇယားတွေထဲမှာ အရပ်သားတွေရော ပါရဲ့လား။

ဗင်းဆင့်

အရပ်သားစာရင်း မပါတတ်ဘူး။ အဲဒါက ပြဿနာပဲ။ အရပ်သားတွေလည်း စစ်ဒဏ်ခံရတာပဲလေ။ ဒါပေမဲ့ အရပ်သား သေကြေဒဏ်ရာရစာရင်းကို အတိအကျရဖို့ကခက်တယ်။ ဘာလို့လဲဆိုတော့ အဲဒီအရပ်သားတွေက စစ်ဒဏ်ကို တိုက်ရိုက်သက်ရောက်ခံရတာ ဟုတ်မဟုတ် ထည့်စဉ်းစားဖို့လိုတယ်။ ဒီတော့ ဗုံးဒဏ်ခံရသလား ဆိုတာမျိုး။ ဒါမှမဟုတ်ရင် စစ်ပွဲကြောင့် သွယ်ဝိုက်တဲ့နည်းနဲ့ အစာရေစာငတ်ပြတ်ပြီး သေဆုံးရတာမျိုးလည်း ဖြစ်နိုင်တယ်။

အန်နီကာ

အကြောင်းရင်းမျိုးစုံကြောင့် နိုင်ငံစုံအတွက် ကိန်းဂဏန်းစာရင်းတွေပေးဖို့က တော်တော်ခက်လိမ့်မယ်ထင်တယ်။ ဥပမာ စစ်အစပိုင်းနဲ့ စစ်ပြီးကာလမှာ နိုင်ငံနယ်နမိတ်အပြောင်းအလဲတွေ ရှိနေတော့ နိုင်ငံတစ်နိုင်ငံရဲ့ ၁၉၁၄ ခုနှစ်က နယ်နိမိတ်စည်းက ၁၉၁၈ ခုနှစ်မှာ တစ်မျိုးအပြောင်းအလဲ ဖြစ်သွားနိုင်တယ်။ ဥပမာအားဖြင့် ဩစတြီးယား။ ဟန်ဂေရီ။ အဲဒီမှာ လူမျိုးပေါင်းစုံပါဝင်တဲ့ စုစည်းထားတဲ့ တပ်မတော်တစ်ခုရှိတယ်။ ဒါပေမဲ့ ချက်နိုင်ငံသား စစ်သားတွေ ဘယ်လောက်တောင် ဆိုကြပါစို့ သေသွားတယ်၊ ဟန်ဂေရီနိုင်ငံသား စစ်သားတွေ ဘယ်လောက်သေသွားတယ် ဆိုတာကို နားလည်ဖို့က တော်တော်ခက်တယ်။ ဒီတော့ နိုင်ငံတွေကိုမကြည့်ဘဲ စစ်တပ်တွေကိုပဲ ကြည့်တာအကောင်းဆုံးပဲ။ အဲသလိုဆိုတော့ စစ်တပ်မှတ်တမ်းတွေကရော ဘယ်လောက်ခိုင်မာသလဲ?

ဗင်းဆင့်

အဲဒါကတော့ နောက်ထပ် ပြဿနာတစ်ခုပေါ့။ စစ်တပ်တွေမှာ မှတ်တမ်းတွေ ရှိပါတယ်။ အဲဒါတွေက သမိုင်းပညာရှင်တွေအတွက် သိပ်အသုံးဝင်တယ်။ ဒါပေမဲ့ ကျွန်တော်တို့ရဲ့ အဓိကပြဿနာက စစ်သားတွေ ဘယ်လောက် အတိအကျ သေဆုံးတယ်ဆိုတာကို စစ်တပ်တွေက သိပ်မပူပန်ခဲ့ကြတာပဲ။ သူတို့တွေက နောက်ထပ်စစ်ပွဲမှာ စစ်သားဘယ်နှစ်ယောက်ထပ်ပြီး စစ်တိုက်နိုင်ဦးမလဲဆိုတာပဲ ပူပန်ကြတာကိုး။ ဥပမာ တချို့စစ်သားတွေဆိုရင် ဖျားနာတာတို့ ရောဂါဖြစ်တာတို့နဲ့ သေကြတယ်။ အဲဒါတွေဆိုလည်း စစ်တပ်က တိုက်ပွဲကျသူအဖြစ် စာရင်းမသွင်းကြပြန်ဘူး။ နောက်တစ်ခု သတိထားရမှာက စစ်သားတွေ ထိခိုက်ဒဏ်ရာ ပြင်းထန်ရင် သူတို့ကို စစ်တပ်က ထုတ်ပစ်လိုက်တာမျိုးရှိတယ်။

သူတို့တပ်ထဲမှာ မရှိတော့တဲ့နောက် တစ်နှစ်၊ နှစ်နှစ်လောက်ကြာမှ တအားပြင်းထန်တဲ့ ဒဏ်ရာတွေနဲ့ သေဆုံးကြတာတွေလည်း ရှိတယ်။ အဲဒီလူတွေကိုလည်း သေစာရင်းထဲမှာ မထည့်ထားပြန်ဘူး။

အန်နီကာ

သမိုင်းပညာရှင်တွေက မကြာသေးခင်ကနှစ်တွေမှာ တို့တွေ ခပ်ပေါ့ပေါ့ သဘောထားခဲ့တဲ့ ကိန်းဂဏန်းတွေကို အမှားပြင်ကြရတယ်။ တော်တော် လျှော့တွက်ခဲ့တာတွေ ရှိပုံရတယ်။ သေကြေဒဏ်ရာရနှုန်းက အရင်က ထင်ထားတာထက်တောင် ပိုများနေတယ်။

ဗင်းဆင့်

ဟုတ်ပါတယ် အမှန်ပဲ။

အန်နီကာ

ဒီတော့ တို့တွေ ဥပမာအားဖြင့် ဗြိတိသျှစစ်သားတွေရဲ့ သေကြေဒဏ်ရာရစာရင်းကို ဖော်ထုတ်မယ်ဆိုရင် ဗြိတိသျှစစ်သားဘယ်နှစ်ယောက် သေဆုံးခဲ့လဲဆိုတာကို ဘယ်လိုဖော်ထုတ်မလဲ။

ဗင်းဆင့်

ထုံးစံအတိုင်း စမယ်ဆိုရင်တော့ အင်တာနက်ပေါ်တက်ပြီး "ပထမကမ္ဘာစစ် သေကြေဒဏ်ရာရစာရင်း" ဆိုပြီး ရိုက်ရှာလိုက်မယ်။ ပြီးရင် ကျလာတဲ့ ပထမဆုံးတစ်ခုနှစ်ခုကို ကြည့်လိုက်မယ်။ ကျွန်တော်တို့ကြည့်နိုင်တဲ့ အင်တာနက်ဝဘ်ဆိုက်တွေ အများကြီးထဲကတစ်ခုက ဥပမာ Wikipedia ရှိမယ်။

အန်နီကာ

အဲဒါဆို United Kingdom အတွက် ဘာပြောလဲ။

ဗင်းဆင့်

ကွန်တော်တို့ တွေ့ရတဲ့ ပထမဆုံး အဓိက ကိန်းဂဏန်းတွေက ကျဆုံးစစ်သည်စာရင်း။ ၇၀၃၀၀၀ နီးပါးကနေ ၈၈၈၀၀၀ လောက် ကြားထဲမှာရှိတယ်။

အန်နီကာ

တော်တော်ကြီးကို ကွဲလွဲနေတာပဲနော်။ တို့တွေ ခုနကပြောခဲ့တာ အဲဒါပဲ။ ခန့်မှန်းခြေတွေက နည်းနေတာများတယ်၊ အခုတော့ ပိုမြင့်သွားပြီ။

ဗင်းဆင့်

ဟုတ်တယ် အမျိုးမျိုးဖြစ်နေတဲ့အချက်က ကျွန်တော်တို့ ကိန်းဂဏန်းအတိအကျ မပေးနိုင်ဘူး ဆိုတာကို အချက်ပြလိုက်တာပဲ။ ဗြိတိသျှအင်ပါယာ တစ်ခုလုံးကို ထည့်တွက်မယ်ဆိုရင် ဩစတြေးလျ ကနေဒါ အိန္ဒိယ နယူးဇီလန်၊ နယူးဖောင်လန်နဲ့ တောင်အာဖရိကတို့က ကိန်းဂဏန်းတွေလည်း ရပါတယ်။ အဲဒါတွေကို ယူကေစာရင်းကို ထပ်ထည့်တယ်ဆိုရင် စုစုပေါင်းတစ်ခုရမယ်။ ၉၀၈၀၀၀ နဲ့ ၁.၁ သန်းကြားရှိမယ်။

အန်နီကာ

အဲဒါတွေက စုစုပေါင်း သေကြေဒဏ်ရာရမှု စာရင်းထဲက ကျဆုံးစစ်သည်စာရင်းပေါ့။

ဗင်းဆင့်

ဟုတ်တယ်၊ ဒီမှာ စာရင်းပြထားတာ ကျဆုံးစစ်သည်စာရင်း တစ်ခုတည်းပဲ။ စာရင်းတိုင်းမှာ အောက်ခြေမှတ်စုတစ်ခုပါတယ်။ ဒါကိုနှိပ်လိုက်ရင် ကိုးကားထားတဲ့ စာအုပ်တစ်အုပ်တော့ ပုံမှန်တွေ့ရတတ်တယ်။ ဒီတော့ ဒီစာရင်းတွေက စိတ်ထဲရှိတာ လျှောက်ထည့်ထားတာ မဟုတ်ဘူးပေါ့။ ပိုကောင်းတာက အဲဒါတွေက တစ်နေရာရာမှာ ပညာရပ်ဆိုင်ရာ သုတေသနလုပ်ထားတာတချို့နဲ့ ဆက်စပ်နေပါတယ်။ ဒီတော့ အလုပ်စလုပ်ဖို့ အတော်ကောင်းတဲ့နေရာ ဖြစ်ပုံရပါတယ်။

အန်နီကာ

တကယ်တော့ ဒီအောက်ခြေမှတ်စုတွေကို ကြည့်လိုက်တော့ ပထမကမ္ဘာစစ်နဲ့ပတ်သက်လို့ ထင်ရှားတဲ့ ကျွမ်းကျင်သူပညာရှင်တွေရဲ့ အမည်တွေအများကြီးကို သတိပြုမိတယ်။ ဒီတော့ ဒါဟာ စိတ်ချရတဲ့ အရင်းအမြစ်တစ်ခုဖြစ်ကြောင်း သဲလွန်စပေါ့။

ဗင်းဆင့်

အမှန်ပဲ။ အင်တာနက်ပေါ်မှာ ရှာထားလို့ကျလာတဲ့အထဲက နောက်လင့်ခ်တစ်ခုကို ဝင်ကြည့်လိုက်မယ်ဆိုရင် ဒီမှာ ဒီဝက်ဘ်ဆိုက်ကိုတွေ့တယ် PBS.org တဲ့။

အန်နီကာ

အဲဒါ အမေရိကန်နိုင်ငံပိုင် ရုပ်သံလွှင့်မီဒီယာ မဟုတ်လား။

ဗင်းဆင့်

ဟုတ်ပါတယ် အဲဒါက အမေရိကန်ရဲ့ အချက်အလက်တွေကိုအခြေခံတဲ့ ဇယားပဲပေါ့။ စစ်အတွင်း ဗြိတိသျှတွေရဲ့သေဆုံးစာရင်းကို ရှာကြည့်မယ်ဆိုရင် အဲဒီစာရင်းကို ထည့်ထားတာမတွေ့ရဘူး။ ဒီမှာတွေ့တာက ဗြိတိသျှအင်ပါယာရဲ့ စာရင်းကိုပဲတွေ့ရတယ်။

အန်နီကာ

အဲဒါဆို PBS ရဲ့အချက်အလက်တွေက ဘယ်ကလာလဲ။ တို့တွေသိလား

ဗင်းဆင့်

ဒီမှာ အကိုးအကားတော့ မတွေ့ရဘူး။ အောက်ခြေမှတ်စုလည်း မပါဘူး။ အခြားတကယ့်အရင်းအမြစ်တွေ သမိုင်းစာအုပ်တို့ တစ်ခုခုတို့ကို ရည်ညွှန်းထားတာလည်း မတွေ့ရဘူး။ ဒါဆိုရင် ဒီအချက်အလက်တွေ ဘယ်ကလာသလဲဆိုတာ သေချာဖို့ဆို ဒီလိုမျိုးဝဘ်ဆိုက်တွေကို အသုံးပြုတဲ့အခါ သတိထားဖို့လိုတယ်။

အန်နီကာ

အပြန်အလှန်ကိုးကားဖို့တော့ အသုံးတည့်တယ် ဒါပေမဲ့ တစ်ခုတည်းသော အချက်အလက်ရင်းမြစ်အဖြစ် မသုံးသင့်ဘူး။

ဗင်းဆင့်

ဟုတ်ပါတယ်။ တစ်ခြား ဘာရည်ညွှန်းကိုးကားချက်မှမပါတဲ့ ဒီလိုဇယားတစ်ခုကိုပဲကြည့်ပြီး အခြားဆိုက်တွေလည်း မကြည့်တော့တာမျိုး မလုပ်ဖို့ ကျွန်တော်တော့ သတိထားရမှာပါ။

အန်နီကာ

အခြားဝက်ဘ်ဆိုက် ကြည့်လို့ရတာ ရှိသေးလား။

ဗင်းဆင့်

ရှိတာပေါ့။ နောက်တစ်ခုက Western Front Association ရဲ့ဝက်ဘ်ဆိုက်ပါ။ သူ့နာမည်အတိုင်းပါပဲ ဒီဆိုက်မှာက Western Front မှာကျဆုံးခဲ့တဲ့ ဗြိတိသျှစစ်သားတွေကိုပဲ အလေးထားတာ တွေ့ရတယ်။ ပထမကမ္ဘာစစ်တုန်းက စစ်မှုထမ်းခဲ့ကြတဲ့ ဗြိတိသျှစစ်သား အတော်အများများက Western Front မှာ တိုက်ပွဲဝင်ခဲ့ကြတယ်လေ။ အားလုံးတော့ မဟုတ်ဘူးပေါ့။ ဥပမာ တစ်ချို့က အရှေ့အလယ်ပိုင်းမှာ၊ တစ်ချို့က အာဖရိကမှာပေါ့။ ဒီမှာပြထားတဲ့ ကိန်းဂဏန်းတွေက Wikipedia တို့လို တခြားဆိုက်တွေမှာ ပြထားတာတွေနဲ့ နည်းနည်းလေး ကွဲလွဲချက်ရှိနေတယ်။

အန်နီကာ

ဟုတ်တယ် ဒီဂဏန်းတွေက မှန်ပါတယ်။ ဒါပေမဲ့ နည်းနည်းလေးပဲ ဖော်ပြထားတာ တွေ့တယ်။

ဗင်းဆင့်

ဟုတ်ပါတယ်။ အမြဲတမ်းတော့ ထပ်တူနှိုင်းယှဉ်ကြည့်လို့ မရဘူး။ အသုံးဝင်တဲ့ ကိန်းဂဏန်းတွေတော့ရှိတယ်။ ဒါပေမဲ့ အဲဒီဇယားနဲ့ အခုကြည့်နေတဲ့ဇယားကို ယှဉ်ကြည့်လို့မရဘူး ဘာကြောင့်လဲဆိုတာ့ ကျွန်တော်တို့က မတူတာနှစ်ခုကို ယှဉ်ကြည့်နေတာကိုး။

အန်နီကာ

တခြားရင်းမြစ်တွေရော။ သမိုင်းပညာရှင်တွေက ပုံနှိပ်အရင်းအမြစ်တွေကို သဘောကျတယ်၊ စာအုပ်တွေကို ကြိုက်တယ်။

ဗင်းဆင့်

စာအုပ်တွေက သေချာပေါက် အသုံးဝင်ပါတယ်။ အင်တာနက်ပေါ်မှာ ကြည့်ပြီးရင် ဆက်ကြည့်ရမယ့် အကောင်းဆုံး နောက်အဆင့်ပဲ။

အန်နီကာ

ဟုတ်တယ် တို့တွေ စာအုပ်နည်းနည်း သွားကြည့်ရအောင်။

ဗင်းဆင့်

ကဲ သွားကြည့်ကြတာပေါ့ဗျာ။

ဂီတသံ

အန်နီကာ

ပထမကမ္ဘာစစ်နဲ့ဆိုင်တဲ့ စာအုပ်တွေကတော့ ပေါပါတယ်။ ဒီတစ်ခုရွေးလိုက်မယ်။ ဒါက ပထမကမ္ဘာစစ်အကြောင်း စွယ်စုံကျမ်းလေ။ သိပ်မကြာခင်က ထုတ်ထားတာဆိုတော့ တစ်ချက်ကြည့်လိုက်ကြရအောင်။

ဗင်းဆင့်

ဂရိတ်ဗြိတိန်နှင့် အိုင်ယာလန်

အန်နီကာ

စစ်ဖက်ကျဆုံးသူဦးရေက ၇၅၀၀၀၀ ဆိုတော့ စောစောက တို့တွေ့ခဲ့တာထက်စာရင် နည်းနည်းများနေသလားလို့။ ဗြိတိသျှလက်အောက်ခံတွေထဲက ၁၈၀၀၀၀ ကို သပ်သပ် စာရင်းပြုစုထားတယ်ဆိုတော့ စုစုပေါင်း ၉၃၀၀၀၀ ပေါ့။ ခုနက တွေ့ခဲ့တာထက် နည်းနည်းလေး ပိုများနေတယ်။

ဗင်းဆင့်

အနည်းဆုံးကိန်းဂဏန်း ဖော်ပြချက်ထက်တော့ များနေပေမယ့် ဝီကီပီးဒီးယားမှာ တွေ့ခဲ့တဲ့ ပမာဏထဲမှာပဲ ရှိနေတာနော်။

အန်နီကာ

အရပ်သားသေဆုံးမှုစာရင်းပါ ဒီမှာရှိတယ်။ ဒါတွေရဖို့က တော်တော်ခက်တယ်။ ဒီမှာကြည့်ရင်သိနိုင်တယ် ဒီကိန်းဂဏန်းတွေက အနီးဆုံးခန့်မှန်းခြေကို လုံးဝမှန်းပြီး ထည့်ထားတာ ၃၀၀၀၀၀၊ ၇၀၀၀၀၀ စသဖြင့်။ မေးခွန်းသင်္ကေတတွေလည်း အများကြီးပဲဆိုတော့ လိုချင်တဲ့အချက်အလက် ဒီထဲမှာမရှိဘူးဆိုတဲ့ သဘောပဲ။ ဒီတော့ တစ်ယောက်ယောက်ကိုသာ ဒီအချက်အလက်တွေပါနိုင်တဲ့ ပထမကမ္ဘာစစ်နဲ့ပတ်သက်တဲ့ နောက်ဆုံးထွက် စာအုပ်တစ်အုပ်အုပ်ကို ညွှန်းရမယ်ဆိုရင် Jay Winters ရဲ့ Cambridge History of the First World Warကို ညွှန်းမိမှာပဲ။ အဲဒီစာအုပ်မှာပါတဲ့ ဇယားတစ်ခု ဒီမှာရှိတယ်။

ဒီတစ်ခုက ဘာအသုံးဝင်လဲဆိုတော့ စာရေးသူတွေက သေဆုံးမှုကိန်းဂဏန်းကို အမျိုးမျိုးပေးထားတာကို နှိုင်းယှဉ်ပြထားတာပဲ။ ၁၉၇၂ ခုနှစ်ကနေ အခုနောက်ဆုံးခန့်မှန်းခြေ တစ်ခုအထိပါ ထည့်ပေးထားတယ်။

ဗင်းဆင့်

စိတ်ဝင်စားဖို့သိပ်ကောင်းတာပဲ ဘာလို့လဲဆိုတော့ တိကျတဲ့ကိန်းဂဏန်းပမာဏကို ဖော်ပြပေးဖို့က ဘယ်လောက်ခက်တယ် ဆိုတာရယ် ခန့်မှန်းခြေတွေက ဘယ်လိုတွေ ကွဲပြားနေတယ် ဆိုတာရယ်ကို ကျွန်တော်တို့ သိသွားပြီ။

အန်နီကာ

ဂရိတ်ဗြိတိန်အတွက် ၇၆၁၀၀၀ သေဆုံးခဲ့တယ်လို့ ဒီမှာစာရင်းသွင်းထားတယ်။ ဒီပမာဏက တို့တွေ့ထားတာထက်ပိုပြီး များတာပဲ။ ဗြိတိသျှအင်ပါယာအတွက်ကရော ဘယ်လောက်လဲ။

ဗင်းဆင့်

ပြီးတော့ ဒီမှာ အင်ပါယာအတွက်စာရင်းကို အပိုင်းပိုင်းခွဲထားတယ်။ စုစုပေါင်း အရေအတွက်ကတော့ ၉၅၉၀၀၀ တဲ့။ အဲဒါလည်း အင်တာနက်ပေါ်မှာ ကျွန်တော်တို့တွေ့ခဲ့တာထက် နည်းနည်းပိုများနေသေးတာပဲ။

အန်နီကာ

ဟုတ်တယ်၊ အမှန်ပဲ။ ဒီတော့ နိဂုံးချုပ်ရရင် စာအုပ်တွေကိုသုံးတာ ပိုကောင်းလား အင်တာနက်ကိုသုံးတာ ပိုကောင်းလား။ ဒီလိုသုတေသနမျိုး လုပ်မယ်ဆို ဘယ်နည်းလမ်းက အကောင်းဆုံးလဲ။

ဗင်းဆင့်

အဲဒီမေးခွန်းက ဖြေရခက်တယ်ဗျ။ အရင်းအမြစ်အစုံကိုသုံးတာ ကောင်းတယ်လို့ထင်ပါတယ်။ စာအုပ်ဆိုရင် ထုတ်ဝေတဲ့ဖြစ်စဉ်ကို ဖြတ်ရသေးတယ်။ အဲဒီတော့ ပညာရှင်တွေ ဝိုင်းဖတ်ပြီး သုံးသပ်တာရှိတယ်။ တခြားသမိုင်းပညာရှင်တွေက အချက်အလက်တွေ ကိန်းဂဏန်းတွေကို စစ်ကြည့်တဲ့ဟာပေါ့။ ယေဘုယျအားဖြင့်တော့ စာအုပ်တွေက အင်တာနက်ပေါ်ကနေ အဖယ်ခံရတဲ့ ဝက်ဘ်ဆိုက်တစ်ခုထက်တော့ ပိုပြီးစိတ်ချရတယ်။ အဲဒီလိုဆိုပေမယ့် ဒီသုတေသနလုပ်ဖို့ အင်တာနက်က အသုံးမဝင်ဘူးလို့ မဆိုလိုပါဘူး။ အကိုးအကား၊ အရင်းအမြစ် စုံလင်အောင်သုံးဖို့က အဓိကလို့ ကျွန်တော်ထင်တယ်။ ဝက်ဘ်ဆိုက်တွေစုံအောင် ကြည့်ရမယ်။ ပိုကောင်းတာကတော့ ပုံနှိပ်ထားတဲ့ စာအုပ်တွေကို ကြည့်ဖို့ပါ။

အန်နီကာ

ကိန်းဂဏန်းတွေ ဘယ်လောက်များသလဲဆို တော်တော်များတာပဲ။ တို့တွေဒီနေ့ ဗြိတိသျှ သေကြေဒဏ်ရာရစာရင်းကိုပဲ အဓိကကြည့်ခဲ့တာ။ စစ်သားဦးရေ ၁၀ သန်းလောက်သေတယ်။ အရပ်သား ၆ သန်းလောက်လည်း စစ်ပွဲထဲမှာ ဆုံးရှုံးသွားတယ်။ ဒီကိန်းဂဏန်းတွေက များလွန်းတယ်။ နားလည်ဖို့ မဖြစ်နိုင်လောက်အောင်ပဲ။

ဗင်းဆင့်

ဟုတ်တယ်။ တစ်ခါတလေ အဲဒီကိန်းဂဏန်းတွေ၊ အချက်အလက်တွေကြည့်ပြီး အဲဒီတုန်းက သေကြေလို့ဖြစ်ရတဲ့ တကယ့်နာကျင်ခံစားရမှုတွေကို တွေးကြည့်ပြီး နည်းနည်းတောင် ကယောင်ခြောက်ခြား ဖြစ်လာနိုင်တယ်။

အန်နီကာ

ဟုတ်တာပေါ့။ နောက်ပြီး လူတွေဘယ်လောက်သေခဲ့လဲဆိုတာ တို့တွေမသိတာ အတော့်ကို နားမလည်နိုင်စရာပဲ။

ဗင်းဆင့်

အမှန်ပဲ ဟုတ်ပါတယ်။ အခုခေတ်မှာတော့ ပထမကမ္ဘာစစ်မှာ လူတွေဘယ်လောက်များများ စစ်ဒဏ်ခံခဲ့ရတယ်ဆိုတာနဲ့ ပတ်သက်ပြီး တစ်ခုခုသိလာဖို့ နည်းနည်းပိုနီးစပ်သွားတယ် ဆိုတာကို သက်သေပြနိုင်ပြီလို့ ထင်ပါတယ်။

အန်နီကာ

ဒီသုတေသနကို အတူတူ ဝိုင်းလုပ်ပေးတာ ကျေးဇူးပါပဲ။

ဗင်းဆင့်

ကျေးဇူးအများကြီးတင်ပါတယ်။

End transcript

Download

 

၁.၃.၂ ကိုယ်တိုင် ရှာကြည့်ပါ။

မြင်ခဲ့သည့်အတိုင်းပင် တိကျသော သေကြေဒဏ်ရာရစာရင်း ရရန်မှာ လွယ်သည့်အလုပ် မဟုတ်ပါ။

စစ်ပွဲအတွင်း ဗြိတိန်နှင့် ဗြတိသျှအင်ပါယာတို့တွင် စစ်သည် မည်မျှဆုံးရှုံးခဲ့သလဲဆိုသည့် ခန့်မှန်းခြေအချို့ကို မြင်တွေ့ခဲ့ရပါပြီ။ ပြီးခဲ့သည့်အခန်းတွင် မြင်ခဲ့သည့်အတိုင်း စစ်ပွဲတွင် ခန့်မှန်းခြေ စစ်သည်ဦးရေ ၁၀ သန်း ကျဆုံးခဲ့ပြီး အရပ်သား ၆ သန်းမျှသည်လည်း စစ်ပွဲကြောင့် အသက်ဆုံးရှုံးရသည်။ ပထမကမ္ဘာစစ်တွင် သေကြေဒဏ်ရာရသည့် ကိန်းဂဏန်းကို အတိအကျရရန် မဖြစ်နိုင်ကြောင်း မြင်တွေ့ခဲ့ပြီဖြစ်သည်။ စစ်သားများစွာသည် သုံ့ပန်းဘဝဖြင့် သို့မဟုတ် တပ်မှထုတ်ပယ်ခံရပြီး နောက်ပိုင်းတွင် သေဆုံးရခြင်းဖြစ်နိုင်ပြီး ယင်းသေဆုံးမှုများကို တရားဝင် ခန့်မှန်းစာရင်းများတွင် ထည့်သွင်းဖော်ပြထားလိမ့်မည် မဟုတ်ပါ။ ထို့ကြောင့် ယင်းသို့သော စာရင်းဇယားများကို ချဉ်းကပ်သည့်အခါတွင် သတိထားဖို့လိုပါသည်။

အန်နီကာနှင့် ဗင်းဆင့်တို့ သုတေသနလုပ်သည်ကို မြင်တွေ့ခဲ့ရပြီဖြစ်၍ ယခုသင်ကိုယ်တိုင် သမိုင်းသုတေသနတစ်ခုလုပ်ရန်၊ သမိုင်းအချက်အလက်များကို မည်သို့ရှာဖွေ၊ ရယူမည်ဆိုသည်ကို လေ့လာရန် အချိန်ကျပါပြီ။

ပထမသီတင်းပတ် အကျဉ်းချုပ်

ပထမရက်သတ္တပတ် အဆုံးအထိ ရောက်လာသည့်အတွက် ချီးကျူးပါသည်။

ထိုပထမပတ်တွင် အောက်ပါတို့ကို လုပ်ဆောင်ခဲ့ပါသည်။

• စျေးဝယ်ထွက်ခြင်းနှင့် ဘဏ်ကိစ္စဆောင်ရွက်ခြင်းများကဲ့သို့ အွန်လိုင်းတွင်လုပ်ဖူးသမျှ လုပ်ဆောင်ချက်များအကြောင်း စဉ်းစားကြည့်ခဲ့သည်။
• အွန်လိုင်းတွင် ပုံစံတကျ မဟုတ်ဘဲ အလွတ်သဘော မည်ကဲ့သို့ လေ့လာနေပြီးသားဖြစ်သည်ကို သိခဲ့ပါပြီ။
• ပုံစံတကျ အွန်လိုင်းမှသင်ယူသူတစ်ယောက် ဖြစ်လာရေးနှင့်ပတ်သက်၍ စဉ်းစားကြည့်ခဲ့ပါပြီ။
• အင်တာနက် အရင်းအမြစ်များ၏ ခိုင်မာမှုကို သုံးသပ်ရသည့် သုတေသန အသေးစားတစ်ခုကို လုပ်ခဲ့ပြီးပါပြီ။

နောက်တစ်ပတ်တွင် သင်ထပ်လေ့လာရမည်များမှာ အောက်ပါအတိုင်းဖြစ်ပါသည်။

• မိမိ၏ အွန်လိုင်းလေ့လာမှုများကို အထောက်အကူပြုမည့် နည်းပညာဖန်တီးမှုများအကြောင်း
• မိမိ၏ လေ့လာသင်ယူမှုကို မည်သို့စီမံခန့်ခွဲနိုင်မလဲ၊ သင်တန်းဆရာများနှင့် အခြားကျောင်းသားများထံမှ မည်သို့အကူအညီရနိုင်မလဲ
• မိမိ၏ ရေရှည်လေ့လာသင်ယူမှုနှင့် အသက်မွေးဝမ်းကြောင်း ပန်းတိုင်းများအတွက် ပြင်ဆင်ပုံတို့ ဖြစ်ပါသည်။

အခု ဒုတိယသီတင်းပတ် - အွန်လိုင်းတွင် လေ့လာသင်ယူခြင်း   သို့ ဆက်သွားနိုင်ပါပြီ။