Pum awgrym ar gyfer gwneud ffrindiau yn y brifysgol

Dyma Rachel Byron, uwch ddarlithydd Iechyd Meddwl a Llesiant ym Mhrifysgol Glyndŵr Wrecsam, i rannu pum awgrym am sut allwch chi fynd ati i feithrin cyfeillgarwch wrth i chi ddechrau ar eich taith yn y brifysgol.

Trawsgrifiad 78.0 KB

Rhowch gynnig ar bethau newydd

Gwnewch restr o bethau yr hoffech chi roi cynnig arnynt, a rhowch gynnig ar bob un ohonynt! Gall fod yn grŵp cerdded, grŵp canu, grŵp dawnsio, grŵp darllen... Gall dilyn eich diddordebau eich hun fod yn ffordd wych o gwrdd â phobl o'r un anian â chi, sy'n sylfaen hyfryd i unrhyw gyfeillgarwch.

Ewch amdani

Pan fyddwn yn teimlo dan straen neu'n bryderus, neu ar ôl cyfnod hir o ynysu, gall aros gartref gyda bocs set fod yn opsiwn llawer mwy cyfforddus na mentro i weithgaredd cymdeithasol. Ceisiwch ddweud 'ie' i bethau, oherwydd gall hyn fod yn ffordd wych o greu cyfleoedd newydd a chwrdd â phobl newydd.

Gofynnwch gwestiynau

Gwybod beth i siarad amdano yw'r peth anoddaf wrth gwrdd â phobl newydd. Cofiwch, gallai'r person rydych chi'n siarad ag ef fod yn teimlo'n nerfus hefyd, a gall dod i wybod mwy amdano dawelu nerfau'r ddau ohonoch. Gofynnwch gwestiynau amdanynt – a chyn pen dim, byddant hwythau'n gofyn amdanoch chithau hefyd.

Gwenwch

Yn aml iawn, mae ein mynegiant wyneb yn dangos a ydym yn teimlo'n bryderus mewn sefyllfa gymdeithasol, a gallwn ymddangos yn flin neu'n oeraidd, heb sylweddoli. Ceisiwch wenu, hyd yn oed os nad ydych yn teimlo fel gwneud. Yn ogystal â gwneud ichi edrych yn fwy cyfeillgar, gallai hefyd wneud ichi deimlo'n fwy hyderus.

Cymerwch yr awenau

Siaradwch â'r bobl yr hoffech chi siarad â nhw – peidiwch â disgwyl iddyn nhw ddod atoch chi. Ffordd dda o ddechrau sgwrs yw gofyn cwestiwn, neu gyflwyno eich hun. Os ydych chi'n teimlo'n nerfus, mae'n syniad da ymarfer cyflwyno eich hun. Po fwyaf rydych chi'n mynd ati i gyflwyno eich hun, y mwyaf hyderus fyddwch chi'n dod!

Darllenwch fwy ar blog Prifysgol Wrecsam.

Darparwyd yr adnodd hwn gan Brifysgol Wrecsam ac mae'n rhan o'r hwb Barod ar gyfer Prifysgol.

Gallwch ddod o hyd i fwy o adnoddau fel hyn ar hafan yr hwb.