Sesiwn 4: Sut brofiad mae pobl yn ei gael o’r gwrandawiad Addasrwydd i Ymarfer?

Cyflwyniad

Mae ein hymchwil yn dangos bod mynd i wrandawiad fel tyst yn gallu achosi straen ni waeth pa mor dda mae rhywun yn paratoi ymlaen llaw. Mae'r gwrandawiad yn broses ffurfiol iawn, a disgwylir i dystion ddilyn cyfarwyddyd y sawl sy'n cadeirio'r gwrandawiad o ran pryd y caniateir iddynt fynd i mewn i ystafell y gwrandawiad, ble maent yn eistedd, a phryd maent yn siarad. Mae Ffigur 1 yn dangos enghraifft o ystafell gwrandawiadau yn y Cyngor Deintyddol Cyffredinol (GDC) a chadair 5 yw lle byddai tyst yn eistedd. Os byddwch chi'n clicio Ffigur 1 byddwch chi'n gallu gweld lle mae pobl eraill yn eistedd a phwy ydyn nhw. Bydd Cadeirydd y panel yn cyflwyno pwy yw pobl ond ni fydd fel arfer yn enwi cleifion ac mae'n bosibl y bydd tyst yn cael ei alw'n 'glaf A' er enghraifft, neu'n 'dyst A'.

Cliciwch yr arwyddion plws wrth ymyl pob cadair wedi'i rhifo i ddarllen pwy sy'n eistedd ymhle.

Fel arfer, mae swyddog gwrandawiadau neu glerc ar gael i'ch helpu a'ch cynghori. Bydd y panel yn eistedd mewn trefniant ffurfiol. Gall y cofrestrai fod yn bresennol neu beidio. Bydd cynrychiolwyr cyfreithiol (bargyfreithwyr neu dwrneiod) yn bresennol. Mae pobl fel arfer yn gwisgo dillad smart.

Fel arfer, ni chaniateir i dystion fynd â nodiadau na dyfeisiau gyda nhw a dim ond pan ofynnir cwestiwn iddynt y disgwylir iddynt siarad. Mae'n ofynnol i dystion dyngu llw (cadarnhau y byddant yn dweud y gwir); gallant wneud hyn ar lyfr sanctaidd o'u dewis neu ddarllen cadarnhad i nodi y byddant yn dweud y gwir. Mae hyn yn bwysig oherwydd pwrpas rheoleiddwyr yw diogelu'r cyhoedd, ond mae hefyd yn haws i dyst ddweud y gwir am y ffeithiau yn ei ddatganiad tyst. Mae'r sesiwn hon yn edrych ar brofiadau o fynd i wrandawiad a chael eich holi fel tyst cyhoeddus.