2 Problem cynilo’r DU
Roedd y fideo yn yr adran flaenorol yn sôn am y gwahanol resymau dros gynilo arian.
Beth bynnag yw eich rhesymau eich hun dros gynilo arian, y gwir amdani yw nad yw’r DU yn dda iawn am wneud hynny! Mae’r data yn y tablau isod yn gwneud hyn yn glir iawn. Mae gan y DU gymhareb cynilion is na’r rhan fwyaf o wledydd eraill Ewrop (Tabl 1) ac yn ystod yr ugain mlynedd ddiwethaf mae wedi bod yn gwaethygu (Tabl 2).
| Gwlad | Cymhareb Cynilion (%) |
|---|---|
| Sweden | 15.40 |
| Yr Almaen | 10.95 |
| Yr Iseldiroedd | 8.40 |
| Ffrainc | 8.38 |
| Iwerddon | 5.78 |
| Yr Undeb Ewropeaidd (cyfartaledd) | 3.70 |
| Y Deyrnas Unedig | 0.37 |
| Blwyddyn | Cymhareb Cynilion (%) |
|---|---|
| 2000 | 4.97 |
| 2004 | 3.68 |
| 2008 | 3.79 |
| 2012 | 4.35 |
| 2016 | 1.74 |
| 2018 | 0.37 |
Gweithgaredd 2 Esbonio cyfradd gynilo wael y DU
Yn eich barn chi, beth yw’r rhesymau dros record wael y DU o ran cynilion?
Answer
Mae nifer o resymau tebygol dros y gymhareb cynilion isel yn y DU.
Yn ystod y degawd diwethaf, gwelwyd gwerth incwm gwirioneddol – hynny yw, incwm ar ôl addasu ar gyfer chwyddiant prisiau – yn gostwng i lawer o bobl. Gyda llai o arian yn weddill ar ôl talu biliau’r cartref, mae’n anochel mae’n debyg y bydd cynilion yn dioddef.
Rheswm arall efallai yw argaeledd dyled. Benthyca arian yn hytrach na defnyddio cynilion yw’r hyn y mae llawer yn ei wneud i dalu am wariant brys bywyd neu, dyweder, am gost gwyliau. Ond gall hyn fod yn ffordd ddrud iawn o dalu costau o’r fath.
Un rheswm dros y gostyngiad yng nghymhareb arbedion y DU yw bod cyfraddau llog yn y DU wedi bod ar lefelau hanesyddol isel ers yr argyfwng ariannol ddiwedd y 2000au – ac wedi cyrraedd y lefel isaf erioed yn 2020 ar ôl i bandemig Covid-19 daro’r DU. Gan fod y llog a delir ar gyfrifon cynilo mor isel, mae’r cymhelliant i gynilo yn llai, ac efallai fod llawer wedi dewis gwario’r arian yn lle hynny.
Arweiniodd pandemig Covid-19 at gynnydd yn y gymhareb arbedion o ganlyniad i leihad yn yr ystod o weithgareddau y gallai pobl wario arian arnynt (fel gwyliau). Wrth i fywyd ddychwelyd yn araf i normal yn 2021 a 2022 mae'r gymhareb arbedion wedi gostwng yn ôl. Mae'r pwysau eithafol ar gyllidebau cartrefi a achoswyd gan yr ymchwydd diweddar mewn costau ynni a chostau eraill yn debygol o roi mwy o bwysau ar i lawr ar y gymhareb.