3 Dewis straeon ar gyfer addysg heddwch
Mae creu cwricwlwm heddwch gobeithiol yn gofyn am graffter gofalus wrth ddewis llyfrau ac adnoddau eraill i adrodd straeon a chefnogi addysg. Er enghraifft, mae llawer o lyfrau fel Coed Heddwch Wangari sy'n archwilio gwaith ymgyrchwyr amlwg. Gall llyfrau o’r fath fod yn fan cychwyn gwerthfawr i blant a phobl ifanc ddysgu am wneud safiad yn y byd.
Fodd bynnag, gall rhai bywgraffiadau adael plant a phobl ifanc gyda'r argraff bod ymgyrchwyr unigol yn newid y byd, heb roi sylw i'r ffyrdd mae mudiadau cyfan o bobl yn cyfrannu at newid cadarnhaol (Moriarty, 2021). Adolygodd Sinead Moriarty nifer o lyfrau am Greta Thunberg, a nododd:
Yn hytrach na chael ei hystyried yn un o nifer fawr o bobl ifanc sy’n ymgyrchu’n frwd dros yr amgylchedd, mae hi [Greta Thunberg] yn cael ei hystyried yn unigryw. Nid yw’r ffocws hwn ar natur unigryw Thunberg yn anghywir, ond mae’n tueddu i anwybyddu gwaith ymgyrchwyr ifanc eraill dros yr hinsawdd, yn enwedig ymgyrchwyr ifanc o liw, ymgyrchwyr brodorol, ac ymgyrchwyr o Dde’r Byd.
Mae Moriarty yn dadlau bod angen i blant a phobl ifanc ymgysylltu â llyfrau sy’n dangos nid yn unig sylfaenwyr mudiadau, ond y mudiadau eu hunain a sut mae pobl yn y mudiadau hynny’n gweithio gyda’i gilydd dros newid. Gallai llenyddiaeth o'r fath helpu plant a phobl ifanc i ddod o hyd i'r cysylltiadau sydd ganddynt yn eu teuluoedd a'u cymunedau yn barod, ac archwilio ffyrdd o gydweithio i fynd i'r afael â materion sy'n peri pryder iddynt (Moriarty, 2021).