4 Cyfrifiadau aml-gam
Yn aml mewn bywyd pob dydd, fe ddewch chi ar draws problemau sy’n gofyn am fwy nag un cyfrifiad i gyrraedd yr ateb terfynol.
Case study _unit2.4.1 Enghraifft: Cyfrifiadau aml-gam
Mae pedwar ffrind yn trefnu gwyliau. Mae’r tabl isod yn dangos y costau:
| Eitem | Pris |
|---|---|
| Hediad (dwy ffordd) | £305 y pen |
| Trethi | £60 y pen |
| Gwesty | £500 am bob ystafell, 2 berson ym mhob ystafell |
| Tacsi i’r maes awyr | £45 |
Bydd y ffrindiau’n rhannu cyfanswm y gost rhyngddyn nhw’n gyfartal. Faint maen nhw’n ei dalu?
Dull
Yn gyntaf, rydym yn lluosi i ganfod cost yr eitemau y mae arnom angen mwy nag un ohonynt:
Hediadau = £305 × 4 = £1220
Trethi = £60 × 4 = £240
Gwesty = Mae angen 2 ystafell ar gyfer 4 person = £500 × 2 = £1000
Nawr rydym yn adio’r cyfansymiau hyn at ei gilydd.
£1220 + £240 + £1000 + £45 = £2505
Yn olaf, mae angen inni rannu er mwyn canfod faint mae pob person yn ei dalu:
£2505 ÷ 4 =£626.25 yr un
Activity _unit2.4.1 Gweithgaredd 10: Cyfrifiadau aml-gam
Mae eich contract ffôn symudol presennol yn costio £24.50 ichi bob mis.
Rydych yn ystyried newid darparwr. Mae’r un newydd yn codi £19.80 y mis ynghyd â ffi cysylltu untro ychwanegol o £30.
Faint fyddwch chi’n arbed dros y flwyddyn trwy newid i’r darparwr newydd?
Rydych chi’n mynd ar eich gwyliau ac rydych wedi penderfynu aros mewn bwthyn yng ngogledd Cymru am 7 noson.
Bydd 12 ohonoch yn aros a chyfanswm cost y bwthyn rydych wedi’i ddewis yw £460 y noson. Os ydych yn rhannu’r gost yn gyfartal, faint fydd pob un yn ei dalu?
Ateb
Yn gyntaf cyfrifwch gost y darparwr presennol
cost fisol × 12
£24.50 × 12 = £294 (darparwr presennol)
Yn ail, cyfrifwch gost y darparwr newydd.
I wneud hyn mae angen ichi gyfrifo cyfanswm y costau misol:
£19.80 × 12 = £237.60
ac yna adio’r ffi cysylltu untro sef £30:
£237.60 + £30 = £267.60 (darparwr newydd)
Yn olaf, gallwch gyfrifo’r gwahaniaeth rhwng y ddau ddarparwr:
£294 − £267.60 = £26.40 wedi’i arbed
I wneud y cyfrifiad, mae angen ichi weithio allan y gost am 7 noson. Pan fyddwch wedi gwneud hyn, gallwch rannu’r cyfanswm â 12:
460 × 7 = £3220
£3220 ÷ 12 = £268.33 (wedi’i dalgrynnu i ddau le degol)
Yma mae’n debyg y byddem yn talgrynnu’r swm hwn i fyny i £286.34 y pen er mwyn sicrhau y caiff y gost gyfan ei thalu.
Mae’r holl enghreifftiau rydym wedi edrych arnyn nhw hyd yma wedi defnyddio rhifau positif. Fodd bynnag, fel mae unrhyw un â gorddrafft yn gwybod, nid yw rhifau (na balansau banc) yn bositif bob amser! Felly mae ein hadran nesaf yn ymdrin â rhifau negatif.
Crynodeb
Yn yr adran hon, rydych wedi:
cymhwyso’r pedwar gweithrediad i ddatrys cyfrifiadau aml-gam.