1.1 Perthnasoedd mentora: twf fel mentor

Sut all yr herio a’r gefnogaeth yr ydych chi’n ei chynnig fel mentor newid ar gamau gwahanol o daith yr athro ar ddechrau ei yrfa , gan sicrhau ei dwf parhaus fel a nodir yn Ffigwr 2? Sut all y syniadau yn Ffigwr 2 eich helpu chi i barhau i dyfu fel mentor? Pwy all eich cefnogi a’ch herio chi? Sut all cael athrawon ar ddechrau eu gyrfa a mentoriaid ar wahanol gamau o’u datblygiad – er enghraifft, mentor ar gam ymgyfarwyddo gydag athro ar ddechrau ei yrfa sy’n barod i ymarfer yn ymreolaethol – effeithio ar y berthynas?

Dadleua Haggar a McIntyre (2006) na ddylai athrawon ar ddechrau eu gyrfa, wneud y canlynol mewn perthynas fentora:

• cydnabod beth mae angen iddynt ei ddysgu
• gofyn am syniadau neu wybodaeth
• deall sut allant ddefnyddio’r syniadau a gânt o ymarfer athrawon profiadol yn eu haddysgu eu hunain.

Yn eu tro, gall athrawon profiadol gymryd eu ‘harbenigedd tawel a greddfol’ yn ganiataol a pheidio â thynnu sylw at yr hyn sydd angen ei wybod ar yr athro ar ddechrau ei yrfa. Gall hyn olygu na roddir amser i agweddau pwysig, megis rhannu syniadau ynghylch penderfyniadau cynllunio ac addysgu cymhleth. Yn aml, mae’n wir fod athrawon ar ddechrau eu gyrfa eisiau datrysiadau cyflym i broblemau, ond rhaid i fentoriaid roi’r gefnogaeth a’r heriau a fydd yn caniatáu athrawon ar ddechrau eu gyrfa i ddeall natur gymhleth addysgu. Rôl y mentor yw gofyn y cwestiynau sy’n caniatáu i’r athro ar ddechrau ei yrfa dynnu ar y cyd-destunau penodol a arsylwyd a rhesymau’r athro dros ei benderfyniadau, gan ddatblygu dealltwriaeth am wybodaeth ymarferol yr athro. Archwilir hyn ymhellach yn Wythnos 3. Gall trafod y rhesymu sydd wrth wraidd gwneud penderfyniadau fod yn anodd i ddechrau oherwydd natur dawel a greddfol y penderfyniadau hyn, ond ni ellir gorbwysleisio buddion cael trafodaeth benodol ar gefnogi dealltwriaeth athrawon ar ddechrau eu gyrfa ac o ran datblygu ymreolaeth.

Gweithgaredd 2 Perthnasoedd symbiotig

Timing: Caniatewch oddeutu 15 munud

Gwrandewch ar y clip sain byr hwn o Kellie yn trafod y berthynas symbiotig rhwng mentor a’r sawl sy’n cael ei fentora.

Download this video clip.Video player: Fideo 1

Dangos y trawsgrifiad | Cuddio'r trawsgrifiad

Transcript: Fideo 1 Kellie: Perthnasoedd symbiotig

Kellie

Heddiw yn y byd addysg, gall cynllunio gwersi eich llethu ar adegau. Ond pan ydych yn cynllunio gyda’ch gilydd, mae cyfrifoldeb ar y ddau ohonoch chi. Ac weithiau gyda syniad mwy arloesol, pan ydych yn gweithio gyda rhywun arall, mae’n rhoi’r hyder i chi roi cynnig ar bethau newydd yn y dosbarth.

Pan ydych yn cynllunio ar y cyd ac mae athrawon dan hyfforddiant yn cynllunio gydag athrawon neu fentoriaid eraill, rwy’n meddwl ei bod hi’n bwysig cofio y bydd yr athro dan hyfforddiant yn aml yn cynnig rhywbeth newydd, rhywbeth gwahanol pan fydd yn cyrraedd. Oherwydd, ar adegau, i athrawon profiadol, weithiau gallant fynd ati i ailadrodd yr un math o weithgareddau. Ac rwy’n credu ei bod hi’n bwysig cofio y gallwn ddysgu cymaint gan athrawon dan hyfforddiant a rhai o’r syniadau newydd, y dulliau ffres, y gall athrawon dan hyfforddiant eu cyflwyno i’r dosbarth. Ac, yn fy marn i, ni ddylid tanseilio hynny.

End transcript: Fideo 1 Kellie: Perthnasoedd symbiotig

Lawrlwytho

Fideo 1 Kellie: Perthnasoedd symbiotig

Interactive feature not available in single page view (see it in standard view).

Myfyriwch ar beth mae’n ei olygu i dyfu fel mentor. Sut mae gweithio gyda’ch athro ar ddechrau ei yrfa yn cyfrannu at y twf hwnnw? Beth arall fydd yn eich helpu chi dyfu fel mentor?

Ysgrifennwch ddarn myfyriol ynghylch beth sydd wedi eich cynorthwyo neu a all eich cynorthwyo fel mentor yn y blwch isod. Ystyriwch rannu eich syniadau gyda chyd-fentor neu rywun sydd wedi eich mentora chi a gofynnwch iddo a ydyw’n teimlo’r un fath.

I ddefnyddio’r ymarferoldeb rhyngweithiol yma, bydd angen cyfrif am ddim gyda’r Brifysgol Agored. Mewngofnodwch neu gofrestrwch.

Interactive feature not available in single page view (see it in standard view).

Mae sawl awdur wedi datblygu damcaniaethau sy’n berthnasol i fentora, a fydd yn eich helpu chi i fyfyrio ar y berthynas sydd gennych gyda’ch athro ar ddechrau ei yrfa wrth iddo ddatblygu yn y proffesiwn. Bydd yr adran nesaf yn trafod y damcaniaethau hyn.