Rheoli ymddygiad
1 Ymddygiad plant
Mae Jon Richards, pennaeth addysg UNISON (a ddyfynnir yn Bennet, 2015a), yn nodi rhai gwirioneddau syml am ymddygiad plant:
- Mae pawb yn profi ymddygiad anodd yn yr ysgol
- Gall plant, fel pawb, fod yn hunanol, yn greulon, yn garedig ac yn anhygoel
- Nid eich bai chi ydyw os byddant yn camymddwyn, ond mae gennych gyfrifoldeb i weithredu os bydd hynny'n digwydd
- Bydd y rhan fwyaf o fyfyrwyr yn hapus i ddilyn rheolau sy'n deg, yn gyson ac yn gymesur
- Mae'n well gan bron bob myfyriwr fod mewn ysgol lle mae'r oedolion yn cymryd ymddygiad o ddifrif.
Activity _unit4.1.1 Gweithgaredd 1
Rhestrwch bum ymddygiad annymunol gan blant yn eich lleoliad.
Comment
Efallai y byddwch wedi nodi rhai o'r ymddygiadau canlynol neu bob un ohonynt:
- difrodi eiddo
- dweud celwydd
- gwneud synau gwirion neu chwarae'r ffŵl
- defnyddio iaith ddifrïol
- ateb staff yn ôl
- peidio â gwrando
- rhedeg dan do, yn hytrach na cherdded.
Gall rhywbeth sy'n annymunol i un person fod yn dderbyniol i rywun arall. Felly, efallai eich bod wedi cael eich synnu gan rai o'r ymddygiadau ar ein rhestr. Efallai yr hoffech fyfyrio ar pam y gellid ystyried bod yr ymddygiadau hyn yn annymunol.
Maent yn debygol o fod yn ymddygiadau y mae'n hawdd eu hystyried yn annymunol am eu bod yn peryglu diogelwch plentyn, neu am eu bod yn aflonyddgar ac yn effeithio ar allu plentyn i ddysgu neu ryngweithio ag eraill.
Wrth i chi weithio drwy'r adran hon ar reoli ymddygiad, efallai y bydd yn ddefnyddiol i chi edrych yn ôl ar yr ymatebion a roddwyd gennych a myfyrio ar sut y gellid rheoli'r ymddygiadau hyn mewn lleoliad ysgol.