8.5 Pa faes nyrsio sy’n addas i fi?

Beth wnaeth eich ysbrydoli chi i fod yn nyrs?

Doeddwn i erioed wedi meddwl am fod yn nyrs cyn i mam fynd yn sâl. Ar y pryd, roeddwn i’n gweithio ym maes yswiriant a dwi’n cofio gwylio’r tîm lliniarol yn delio â mam, a sut roedden nhw’n ei thrin gyda chymaint o barch a charedigrwydd. Dwi’n cofio gwylio hynny a meddwl byddwn i wrth fy modd yn gallu gwneud hynny.

Yr hyn sy’n rhoi boddhad yn y swydd yw gwybod fy mod wedi gallu helpu rhywun i symud ymlaen gyda’i ofal neu ei nodau, dim ots pa mor fach yw fy rhan i.

Roedd tyfu i fyny gyda nain a gweld sut roedd ei salwch corfforol wedi effeithio ar ei hiechyd meddwl wedi fy annog i ddilyn gyrfa mewn nyrsio iechyd meddwl. ‘Nes i wneud cais am swydd fel cynorthwyydd nyrsio ar ward seiciatrig acíwt a dwi ddim wedi edrych yn ôl ers hynny.

Yn yr ysgol gynradd, dwi’n cofio helpu i setlo plentyn ychydig flynyddoedd yn iau na fi. Roedd ganddo syndrom Down ac un tro, ‘nes i glywed ei rieni’n dweud wrth fy athro nad oedden nhw erioed wedi gweld eu mab yn cael ei drin fel rhywun cydradd gan un o’i gyfoedion. Er fy mod i mor ifanc, dwi’n cofio pa mor deimladwy oedd hynny a dwi’n meddwl bod fy angerdd yn deillio o hynny. Dwi’n teimlo’n gryf am eirioli dros hawliau pobl ag Anableddau Dysgu a chwalu’r rhwystrau sy’n atal pobl rhag cael gafael ar ofal a gwasanaethau.

Roeddwn i’n gwybod fy mod i eisiau bod yn Nyrs Anableddau Dysgu gan fy mod i’n mwynhau ffurfio perthynas hirdymor gyda fy nghleifion, ac roeddwn i eisiau bod yn ddylanwad cyson a chadarnhaol ar fywydau’r bobl dwi’n eu cefnogi.

Beth ydych chi wedi’i fwynhau am eich profiad hyd yma?

Dwi wedi mwynhau’r amrywiaeth yn fy lleoliadau yn fawr. Mae hyn wedi fy ngalluogi i feddwl am ofal cleifion o wahanol safbwyntiau.

Dwi wrth fy modd â rhan ymarferol y cwrs. Dwi wrth fy modd yn bod yn ymarferol, yn cwrdd â phobl, ac yn gwrando ar eu straeon neu eu hanesion. Dwi wedi mwynhau bob dydd o bob lleoliad gwaith hyd yma.

Dwi wedi mwynhau sawl agwedd ar y rhaglen nyrsio, ond yn bennaf, dwi wedi mwynhau hyblygrwydd a hwylustod dysgu o bell.

Pam wnaethoch chi ddewis astudio gyda’r Brifysgol Agored?

Yn academaidd, doeddwn i byth yn hoff iawn o’r ystafell ddosbarth, ac roeddwn i’n hoffi’r syniad o gael cynllun astudio mwy hyblyg.

Y Brifysgol Agored oedd y darparwr perffaith ar gyfer astudio gan fod y dysgu’n hyblyg a bod modd ei wneud pan fydd hi’n gyfleus i mi yn bennaf, hyd yn oed os yw hynny’n golygu mewngofnodi i ddarllen erthygl am 3am ar shifft nos dawel.

Mae astudio gyda'r Brifysgol Agored yn golygu eich bod yn gallu astudio gartref, ac yn gallu trefnu'r astudiaeth o amgylch eich bywyd a'ch gwaith.