2.3 Cyfweliadau ar-lein

Wrth wneud cais am swydd mewn gweithle hybrid, yn aml byddwch yn cael gwahoddiad i gyfweliad ar-lein. Bydd rhai cyflogwyr yn cynnal pob cyfweliad ar-lein, tra gall cyflogwyr eraill ofyn i chi wneud profion cymhwysedd ar-lein fel rhan o'r broses ddethol, cyn cynnal y rownd gyntaf o gyfweliadau ar-lein ac yna eich gwahodd i'r swyddfa. Y naill ffordd neu'r llall, mae’n hollbwysig paratoi.

• Gwnewch yn siŵr fod popeth yn edrych yn daclus yn eich gweithle rhithwir.

• Darganfyddwch pa lwyfan neu gymhwysiad y bydd eich cyfweliad ar-lein yn ei ddefnyddio ac yna ymgyfarwyddwch ag ef trwy lawrlwytho'r ap a phrofi eich cysylltiad â ffrind.

• Os ydych chi'n defnyddio meddalwedd ar sail porwr yn hytrach nag ap, gwnewch yn siŵr bod eich porwr gwe wedi'i ddiweddaru ac yn bodloni unrhyw ofynion cydweddoldeb.

• Defnyddiwch we-gamera o ansawdd da, fel eich bod yn cael eich gweld yn glir, a gwnewch yn siŵr bod eich meicroffon yn gweithio.

• Ceisiwch sicrhau eich bod mewn lleoliad tawel, heb unrhyw bethau sy'n tynnu sylw neu’n torri ar draws. Os ydych chi'n byw â phobl eraill, rhowch wybod iddynt eich bod yn cael eich cyfweld. Os oes gennych anifeiliaid anwes, gwnewch yn siŵr eu bod mewn rhan arall o'ch cartref, os yn bosibl.

Trwy gael gofod cyfweliad rhithwir sydd wedi'i baratoi'n dda, byddwch yn gwella'ch siawns o wneud argraff gyntaf wych ar y cyfwelydd.

Mae ymchwilio'n dda i'r cwmni, a pharatoi ar gyfer cwestiynau cyfweld tebygol, yn syniad da iawn. Yn y fideo canlynol, mae Zainab a Ploy o iungo Solutions yn disgrifio eu profiadau cyfweliad, gan gynnwys awgrymiadau i ymgeiswyr niwrowahanol.

Download this video clip.Video player: hyb_8_2022_sep102_preparing_for_interviews_compressed.mp4

Dangos y trawsgrifiad | Cuddio'r trawsgrifiad

Transcript

ZAINAB AL MUHARRAMI:

Fe wnes i gais am y rôl bresennol hon gan ddefnyddio cynllun i raddedigion. Y broses gyfweld ar gyfer hwnnw oedd dau gyfweliad â’r cynllun i raddedigion, ac yna un cyfweliad ag iungo. Ac wedyn ar ôl y broses honno, ges i'r swydd. Y broses gyfweld oedd fy mod wedi llwyddo i ddod trwy'r cyfweliad grŵp â’r cynllun graddedigion, a oedd wedyn yn fy rhoi ar y rhestr fer ar gyfer cyfweliadau iungo.

Cefais gyfweliad â dau unigolyn o'r tîm technoleg a'n dynes Adnoddau Dynol, Ploy. Ac fe wnaethon nhw ofyn rhai cwestiynau i mi am fy nghefndir a’m profiad, a dywedais wrthyn nhw nad oedd gen i lawer o brofiad yn y diwydiant codio mewn gwirionedd, oherwydd fy mod newydd ddysgu fy hun sut i godio. Ac mi wnes i'r rhaglen, a oedd yn gwrs i ddechreuwyr. A dyma nhw'n dweud ei fod yn iawn, ac y byddwn i'n gallu dysgu mwy yn y gwaith beth bynnag. Felly roedd hynny'n gwneud i mi deimlo'n well am y swydd.

PORNNARAI NILDUANG:

Hi, fy enw i yw Ploy. Rydw i'n dod o iungo Solutions ac rydw i’n gweithio fel Swyddog Gweithredol Adnoddau Dynol a Recriwtio. Fe wnes i gais am fy rôl bresennol trwy’r rhaglen ‘kickstart’. Felly roedd yn ddiwrnod pan ddaethon nhw i'r ganolfan waith i gyfweld â llwyth o ymgeiswyr, ac roeddwn i'n digwydd bod yn un ohonyn nhw.

Felly, bûm yn sgwrsio am gyfnod byr ag un o'r bobl uwch. Ac yna, ges i gyfweliad ffôn manwl â Phrif Swyddog Gweithredol y cwmni. Roedd yn weddol hamddenol, yn sgyrsiol. O'i gymharu â'r rolau eraill roeddwn wedi gwneud cais amdanyn nhw, byddwn i'n dweud ei fod ychydig yn llai ffurfiol. Felly roedd gan y rhan fwyaf o'r rolau eraill brosesau gwneud cais eithaf hir, profion personoliaeth efallai, ac yna byddech chi'n mynd i mewn am gyfweliad. Ac yna o bosib, gallai fod yn un-i-un neu bydd yn gyfweliad grŵp. Os oedd yn gyfweliad grŵp, bydden ni'n cael ein gwahodd yn ôl am gyfweliad unigol, ac yna'n cael gwahoddiad eto am ddiwrnod profiad. Ac yna byddan nhw'n dweud wrthych chi beth oedd canlyniad hynny. Felly o'i gymharu â'r rolau eraill dwi wedi gwneud cais amdanyn nhw, roedd yr un yma'n eithaf byr a syml.

Felly o ran rhwystrau, dwi'n meddwl mai proses gwneud cais hir, gymhleth fyddai’r prif un, yn enwedig os ydych chi'n niwrowahanol. Felly os nad ydych chi'n dda â rhestrau a sawl cwestiwn, dwi'n meddwl y byddai'n achosi dipyn o straen. Felly byddwn i'n argymell pobl sy'n niwrowahanol, yn teimlo straen o wneud hynny, i ofyn i aelod o'r teulu fynd trwy’r broses â nhw ar lafar a'u helpu trwy’r broses.

Gan ddibynnu ar y rôl rydych chi'n ei gwneud, efallai y bydd gofyn i chi wneud tasg dechnegol. Felly mae'r rhyngrwyd yn gyfoeth o wybodaeth. Felly rwy'n bendant yn argymell pobl i wneud eu hymchwil yn drylwyr ar y cwmni. Mae yna lawer, yn enwedig, os ydych chi'n mynd am gwmni adnabyddus, corfforaethol iawn, bydd cwestiynau cyfweliad, a phrofion, a stwff. Felly yn bendant, meddyliwch am eich cwestiynau, yn enwedig os oes gennych gyfweliad rhithwir. Dydyn nhw ddim yn gallu gweld eich gliniadur, felly os dymunwch roi nodiadau nesaf at eu hwynebau, dwi'n golygu, dyna wnes i pan ges i gyfweliadau, ac mae'n dipyn o hac fach, yn enwedig os yw'n gwmni eithaf mawr, ac mae ganddyn nhw lawer o wybodaeth allan yna.

End transcript

Lawrlwytho

 

A oedd unrhyw dechnegau defnyddiol y mae Zainab a Ploy yn sôn amdanynt yn y fideo a allai eich helpu?

Dylech ysgrifennu popeth rydych yn meddwl y byddai'n rhaid i chi ei wneud yn y swydd. Dylai'r swydd ddisgrifiad eich helpu i wneud hyn hefyd. Paratowch atebion, gan ddangos sut mae eich sgiliau a'ch profiad yn cyd-fynd â phob un agwedd o'r swydd. Er enghraifft, os yw ‘cyfathrebu â chleientiaid’ yn un o rannau'r swydd, paratowch ateb sy'n esbonio sut rydych wedi cael profiad o gyfathrebu â chleientiaid yn y gorffennol, a sut mae’ch sgiliau cyfathrebu yn eich gwneud yn ymgeisydd perffaith ar gyfer y swydd newydd hon.

Yn ogystal â pharatoi atebion ar sail sgiliau, dylech baratoi atebion cyfweliad generig rhag ofn y gofynnir cwestiynau cyfweliad clasurol i chi fel y rheiny a ddangosir yn Nhabl 1.

Mae'n debyg y gofynnir o leiaf un neu ddau o'r rhain i chi yn ystod y cyfweliad, ac os oes gennych ateb da wedi'i baratoi, bydd gennych siawns llawer gwell o gael y swydd.

Dylech ymarfer â ffrind neu aelod o'r teulu. Gofynnwch iddynt ofyn cwestiynau gwahanol i chi am y swydd, ac ymarferwch ateb o'u blaenau. Weithiau gallwch gael ateb gwych wedi'i ysgrifennu, ond pan fyddwch yn ceisio ei ddweud yn uchel mae'n swnio'n ofnadwy. Ymarfer ateb cwestiynau yn uchel yw’r unig ffordd y byddwch yn gallu paratoi'n iawn ar gyfer cyfweliad go iawn.