1 Blaenoriaethau sy’n newid

Wrth i'r ffordd rydym yn gweithio newid, mae llawer o sefydliadau'n ailddiffinio eu diwylliant a'u profiad i weithwyr ar gyfer byd pell a hybrid-yn-gyntaf, ac yn canolbwyntio ar ddatblygu gweithleoedd mwy cynhwysol a hyrwyddo symudedd cymdeithasol. I ddeall beth mae sefydliadau yn ystyried, a'r sgiliau y maent yn canolbwyntio arnynt, yn y fideo isod, mae Jessica Leigh Jones MBE, cyd-sylfaenydd a Phrif Weithredwr iungo Solutions, cwmni sy'n gweithio ar groestoriad busnes, addysg a llywodraeth, yn trafod yr hyn y gall cyflogwyr ei wneud i fanteisio i’r eithaf ar amrywiaeth a galluogi symudedd cymdeithasol, gan arsylwi bod 'dysgu a datblygu'n chwarae rôl bwysig wrth lefelu'r cae chwarae ar gyfer doniau sy'n amrywiol yn gymdeithasol'.

Mae recriwtio a chadw doniau sy'n gymdeithasol amrywiol o fudd i gyflogwyr a gweithwyr ond, fel mae Gemma Hallett, Pennaeth Sgiliau yn Fintech Wales a sylfaenydd Mifuture, yn dweud yn y fideo, mae paru sgiliau â rolau, yn enwedig mewn ardaloedd gwledig anghysbell yng Nghymru, wedi bod yn broblem ar adegau. Fodd bynnag, mae gweithio o bell a hybrid yn dod â chyfleoedd newydd i'r cymunedau hyn - er nad yw hyn heb ei heriau.

Download this video clip.Video player: hyb_8_2022_sep100_being_an_inclusive_organisation_compressed.mp4

Dangos y trawsgrifiad | Cuddio'r trawsgrifiad

Transcript

JESSICA JONES:

Jessica Leigh Jones ydw i. Fi yw cyd-sylfaenydd a phrif weithredwr iungo Solutions a fi hefyd yw cyn-gadeirydd y Ganolfan Gwasanaethau Cyhoeddus Digidol yng Nghymru. Cafodd fy mhapur gwyn newydd, a ysgrifennwyd ar y cyd â'r Brifysgol Agored a TrainingZone, ei lansio'n ddiweddar. Ac rydym yn edrych ar rôl dysgu a dysgu a datblygu wrth alluogi symudedd cymdeithasol.

Felly mae'r papur gwyn yn ymarferol iawn. Byddwn yn ymchwilio'n ddwfn i gronfeydd doniau cymdeithasol amrywiol gwahanol, y rhwystrau penodol maent yn eu hwynebu, a sut y gallwn helpu'r unigolion a'r grwpiau hynny i gyfrannu at y sefydliad ac ychwanegu gwerth iddo, gan allu symud ymlaen a gwella eu symudedd cymdeithasol hefyd. Felly mae'n bapur ymarferol iawn, iawn. Rydym yn awyddus i ddarparu cynghorion ac awgrymiadau i wneud y gorau o amrywiaeth gymdeithasol ac i wneud y gorau o'r doniau yn eu sefydliad, ar adeg anodd iawn, iawn i recriwtio a chadw doniau newydd.

Pan fyddwn yn trafod symudedd cymdeithasol o gyd-destun y gweithle, rydym yn sôn am y ffordd y gallwn nodi grwpiau o unigolion y gall fod ganddynt rwystrau penodol oherwydd eu cefndir cymdeithasol-economaidd, a sut y gallwn helpu'r unigolion hynny i oresgyn y rhwystrau hynny, er mwyn iddynt allu cyflawni lefelau uwch o lwyddiant a chynnydd yn y sefydliad. Mae symudedd cymdeithasol yn bwysig i sefydliadau oherwydd, fel y gwyddom, mae'n anodd iawn, iawn recriwtio a chadw doniau. Ac felly, yr hyn y mae recriwtio o gronfa doniau cymdeithasol amrywiol yn ei gynnig yw'r gallu i recriwtio, tyfu, cadw a gwobrwyo mathau gwahanol o ddoniau a all gynnig cyfraniadau gwahanol, safbwyntiau gwahanol, syniadau amrywiol, a all helpu'r sefydliad hwnnw i fynd ymhellach.

Mae sawl math gwahanol o symudedd cymdeithasol. A cheir arweiniad yn yr adroddiad ar sut y gallwch chi, fel sefydliad, dim ots beth yw eich maint na'ch adnoddau na'ch arbenigedd yn y maes hwn, fesur amrywiaeth gymdeithasol eich gweithlu. Ceir arweiniad hefyd ar sut y gallwch gefnogi unigolion penodol i ddatgloi'r potensial sydd ganddynt a'u cynnydd yn eich sefydliad.

Mae dysgu a datblygu yn chwarae rôl bwysig wrth sicrhau cyfle ar yr un lefel i ddoniau cymdeithasol amrywiol, yn enwedig i unigolion na wnaethant, o bosib, ymgysylltu'n arbennig o dda yn yr ysgol, dysgu a datblygu yn y gweithle a dysgu a datblygu yn nes ymlaen mewn bywyd. Mae'n cynnig y cyfle hwnnw i unigolion fanteisio ar addysg lefel uwch heb fod mewn amgylchedd addysg amser llawn a allai deimlo fel un brawychus. Ac mae hyn ychydig yn fwy ymarferol er mwyn iddynt allu cymryd rhan mewn dysgu o gwmpas eu hymrwymiadau yn y cartref, yn y gwaith ac mewn bywyd hefyd.

GEMMA HALLETT:

Mae llawer o bobl, pobl ifanc yn ne Cymru wyddoch chi, yn byw mewn tlodi cenedliadol. Rydym mewn trydedd cenhedlaeth o dlodi mewn rhai rhannau o'r cymoedd. Os gallwn chwalu'r rhwystrau hyn gan ddefnyddio cysyniad syml iawn y gwnaeth y bobl ifanc helpu i'w gynllunio, er mwyn dod â'r cyfleoedd hyn i'w cymunedau. A gyda gweithio fel y mae, modelau hybrid, mae gennym gwmnïau yng Nghaerdydd a all gyflogi pobl o'r cymoedd, a gallant weithio heb orfod teithio.

Mae cyfle a her i sefydliadau yng Nghymru hefyd. Felly, os byddwn ond yn canoli o gwmpas Caerdydd ar hyn o bryd. Gall cwmnïau yng Nghaerdydd gyflogi pobl yn y cymoedd, pobl sy'n meddwl mai teithio i achlysur a wnant i Gaerdydd yn hytrach na chymudo yno.

Felly mae'n agor y gronfa talent honno. Gallwn gyrraedd y cymunedau oherwydd dulliau gweithio o bell. Gallwn gynnig swyddi yng Nghymru i bobl o Gymru. I'r gwrthwyneb, am nad yw'r set sgiliau ar gael o bosibl, mae'r swyddi hynny yn mynd i weithwyr o bell mewn lleoedd eraill. Felly rydym yn allforio sgiliau. Mae'n ddrwg gen i, rydym yn mewnforio sgiliau, rydym yn allforio swyddi. Ac mae hynny'n bryder gwirioneddol i mi, oherwydd, petai gennym y doniau, os ydym wedi bod ar daith ac wedi uwchsgilio'r doniau hynny erbyn hyn, roeddem yn gwybod bod gweithio o bell ar y ffordd bob amser, ond mae'r pandemig wedi cyflymu'r peth. Yn anffodus, nid oes gan gwmnïau yng Nghymru fynediad i'r doniau sydd eu hangen arnynt, felly maent yn gorfod allforio swyddi, mewnforio doniau. Ond gobeithio, gyda'r gwaith rydw i'n ei wneud a llawer mwy, gallwn uwchsgilio cenhedlaeth er mwyn i'r swyddi hynny aros yng Nghymru.

JESSICA JONES:

Mae llawer o alluogwyr ar gael i gyflogwyr i'w helpu i weithio gyda'r grwpiau cymdeithasol amrywiol hyn. Felly, ymyriadau tymor hwy, efallai pethau fel prentisiaethau – uwch-brentisiaethau, prentisiaethau lefel mynediad. Mae llwybrau gwahanol amrywiol yn bodoli i gymryd pobl o bob lefel o'r sefydliad hyd at lenwi'r bylchau hynny mewn sgiliau allweddol.

Ceir hefyd ymyriadau llawer mwy byrdymor sydd wrthi'n cael eu datblygu. Er enghraifft, gall y sesiynau sgiliau newydd dwys a'r academïau siliau a chynhyrchion cysylltiedig sy'n bodoli yn y pedair gwlad helpu'n wirioneddol i atal y gofynion sgiliau byrdymor di-oed hynny.

End transcript

Lawrlwytho

 

Yn amlwg, mae'r gweithle hybrid yma i aros, sy'n golygu ei bod yn bwysicach nag erioed i ddysgu a datblygu'r sgiliau a'r ymddygiadau sydd eu hangen i lwyddo yn yr amgylchedd newydd hwn.

Os ydych ar fin cychwyn yn y gweithle neu ddychwelyd iddo, dyma amser da i feddwl am eich disgwyliadau ynglŷn â gweithio hybrid a myfyrio ar beth yw eich blaenoriaethau ar gyfer datblygiad personol a phroffesiynol yn y cyfnod nesaf hwn o'ch bywyd. Bydd Gweithgaredd 1 yn eich helpu i ystyried y ddau beth hyn mewn perthynas â'r cwrs hwn.