Cam 6: Adborth a dilyniant

Ar ddiwedd y gweithdy, rhowch gyfle i gyfranogwyr rannu eu profiadau o wneud y gweithdy a sut maent nawr yn teimlo am gynllunio dyfodol.

Dyma gwestiynau a all fod yn ddefnyddiol eu hystyried:

• Sut mae cyfranogwyr yn teimlo?
• Beth yw'r effaith arnyn nhw?
• Beth arall hoffent ei wybod?
• Beth arall hoffent ei rannu?
• Ai dyma beth oeddent yn ei ddisgwyl?
• Beth fydden nhw'n ei newid?

Felly, mae'n bwysig mynd ar drywydd hyn gyda chyfranogwyr i geisio unrhyw eglurhad o'u cyfraniad i'r gweithdy. Ar ôl amser i fyfyrio, a oes unrhyw beth arall y dymunant ei gyfrannu tuag at grynodeb o'r canlyniadau?

Dylai cynllunio dyfodol fod yn broses barhaus o fewn sefydliadau, felly ystyriwch eich dull o gynllunio cylchredau.

Gall ‘Islands in the Sky’ fod yn ddull effeithiol i'ch helpu chi i feddwl am senarios y dyfodol ac ymchwilio i broblemau yn gyflym. Mae wedi'i ddylunio i ganolbwyntio ar ddeall eich amgylchedd a'r gwerth y gallwch ei gynhyrchu oddi mewn i'ch perthnasoedd gweithrediadol er mwyn ennill persbectif newydd.

Yn y fideo, rhanna Dr Matt Finch awgrymiadau ar gyfer defnydd effeithiol o'r dull ‘Islands in the Sky’.

Download this video clip.Video player: Fideo 17

Dangos y trawsgrifiad | Cuddio'r trawsgrifiad

Transcript: Fideo 17 Awgrymiadau ar gyfer defnyddio ‘Islands in the Sky’

MATT FINCH:

Mae'r awgrymiadau fyddwn i'n eu rhoi i bobl sy'n defnyddio adnodd Islands yn syml iawn. Y peth cyntaf yw meddwl yn galed iawn wrth ichi fapio'r ynys cydberthnasau honno. Mae'n hawdd iawn diystyru actor neu ei gymryd yn ganiataol. Pan fyddwch chi wir yn cymryd amser i feddwl am bob un endid y mae eich sefydliad neu eich tîm neu eich cymuned yn rhyngweithio ag ef, o ran mynd o gwmpas ei fusnes, fe welwch chi fod yna ecosystem gyfoethog a chymhleth. Felly, cymerwch amser yn ailadrodd, gan sicrhau bod sawl un ynghlwm, y bydd gan bob un ohonynt safbwyntiau gwahanol, y byddant yn nodi cydberthnasau rydych chi wedi'u diystyru, y bydd pob un ohonynt o fantais.

Ac yna, unwaith eto, o ran yr elfennau ansicr hynny, i'r graddau y mae'r ansicrwydd cyd-destunol yn cymell grymoedd sy'n ffurfio penderfyniadau'r actorion eraill, mae'n werth cymryd amser bron i fynd i sefyll yn esgidiau pob actor gwahanol ar yr ynys honno gyda chi a meddwl beth sy'n cymell eu penderfyniadau? A dyma lle y gallwch ennyn mewnwelediadau gan brofiad y defnyddwyr a'r defnydd o bersonâu, er enghraifft. Allwch chi wir geisio dychmygu sut beth yw hi i bob un o'r actorion hynny fyw ar yr ynys honno ar hyn o bryd? Beth sy'n cymell eu penderfyniadau?

Ac yna, wrth i chi gynhyrchu ynysoedd i'r dyfodol, fel senarios, sy'n dangos i ni sut gallai pethau fod yn wahanol yn y dyfodol, unwaith eto, gallwch eistedd yn safle'r actorion gwahanol ar yr ynys. A dweud, sut beth fyddai i fyw, gweithio a bod yn y cyd-destun hwnnw yn y dyfodol? Felly, mae wir yn gyfle ar gyfer empathi, dychymyg a chwarae, sydd bob amser yn cefnogi'r gwaith o wneud penderfyniad go iawn ar hyn o bryd, ond yn gyfle hefyd i fynd y tu hwnt i'r pethau nad ydym yn cymryd yr amser i'w cwestiynu o ddydd i ddydd efallai.

Mae'r enw Islands in the Sky ei hun yn wahoddiad. Mae'n rhoi gwybod i bobl fod elfen o chwarae pan fyddant yn cymryd rhan yn y broses hon. Ceir elfen o hud a lledrith. Ac mewn gwirionedd, bod seiliau'r cyd-destunau a ddychmygwyd i'r dyfodol, oherwydd ni fyddant fel ddoe, nad ydynt wedi'u seilio'n gyfan gwbl ar ddisgwyliadau a thybiaethau'r gorffennol, mae modd eu hadeiladu hefyd ar sail beth os. Y cwestiynau o beth allai ddigwydd. Y pethau sy'n mynd y tu hwnt i'n disgwyliadau arferol. Y ffyrdd y credwn y bydd tueddiadau'n amlygu eu hunain.

Maen nhw'n ffordd o feddwl am beth fydd yn digwydd os bydd tuedd yn plygu neu hyd yn oed yn torri. Ac mae hynny'n golygu eu bod nhw, mewn ffordd, yn edrych mwy ar yr awyr ac yn gweld lluniau yn y cymylau, yn gweld wynebu'n llithro heibio i ni. Ond nid yw hynny'n golygu na fyddant yn cefnogi rhywbeth go iawn a difrifol iawn pan ddaw hi i'r penderfyniadau a wynebwn mewn cyfnodau cythryblus.

Bydd cyfranogwyr yn y broses hon yn cael mynediad i'r gofod hwn sydd bron fel blwch tywod neu gorlan chwarae, lle gallant ystyried sut y gallai materion amlygu eu hunain mewn ffyrdd sy'n heriol neu'n digwydd ar hap. Gallant edrych ar bethau na fyddent yn cael eu hystyried yn yr arfer cyffredin o gynnal eu gweithrediadau, pethau na fyddent yn cael eu hystyried mewn ffyrdd traddodiadol o feddwl am strategaeth o bosibl, fel dadansoddiadau SWOT. Nod Islands in the Sky yw mynd y tu hwnt i'r disgwyliadau presennol. Ac mae hynny'n golygu y gall cyfranogwyr ddod â'u pryderon a'u cwestiynau eu hunain, ond mae hefyd yn golygu y gallant ddisgwyl cael eu synnu.

Ac mae'n bosibl y bydd elfen o anesmwythyd hefyd. Ac nid yw hynny oherwydd eu bod yn bwriadu bod yn ddystopaidd. Nid oes a wnelo hyn â'r dyfodol rydym ei eisiau neu'n ei ofni. Nid oes a wnelo â disgwyliadau a darogan. Ac nid oes a wnelo â normau. Mae a wnelo mewn gwirionedd â gweld rhywbeth sy'n ein synnu ni.

Ond mae hynny'n golygu y gallwn ddisgwyl y foment honno sydd ychydig yn anesmwyth, a all deimlo fel rhywbeth cwbl gyffrous. Gall deimlo fel moment 'aha' neu 'waw'. Doeddwn i erioed wedi meddwl y gallai'r byd fod fel hynny, ond nawr fy mod i wedi edrych ar yr ynysoedd hyn, gallaf weld sut gallai'r byd newid. Ac mae hynny'n golygu y byddaf yn meddwl yn wahanol am y penderfyniadau y mae'n rhaid i mi eu gwneud heddiw.

End transcript: Fideo 17 Awgrymiadau ar gyfer defnyddio ‘Islands in the Sky’

Lawrlwytho

Fideo 17 Awgrymiadau ar gyfer defnyddio ‘Islands in the Sky’

Yn yr adran nesaf, cewch gyfle i ystyried astudiaeth achos ar y defnydd o ‘Islands in the Sky’ yn y Brifysgol Agored.