Sgipio i'r cynnwys
Mynd i'r prif gynnwys
header search
ahihi OpenLearn
OpenLearn
Menu
sticky search

Ynghylch y cwrs am ddim hwn

Dewch yn fyfyriwr gyda’r Brifysgol Agored

English

Lawrlwytho'r cwrs hwn

Rhannu'r cwrs am ddim hwn

Cynnwys y cwrs Cynnwys y cwrs
Gweithio hybrid: llesiant a chynhwysiant
Gweithio hybrid: llesiant a chynhwysiant

Dechrau'r cwrs am ddim hwn nawr. Crëwch gyfrif a mewngofnodwch. Ymrestrwch a chwblhewch y cwrs am ddatganaid o'ch cyfranogiad neu fathodyn digidol am ddim os ydynt ar gael.

Mwy o gyrsiau am ddim

4.5 Agweddau cadarnhaol a negyddol ar lesiant gwaith digidol

Ffeithlun gan Jisc yw Ffigur 8 sy'n crynhoi nodweddion cadarnhaol a negyddol llesiant gwaith digidol o safbwynt ei fframwaith galluoedd digidol unigol.

Y ddelwedd a ddisgrifir
Ffigwr 8 Llesiant gwaith digidol.
Dangos disgrifiad|Cuddio disgrifiad

Mae'r ffeithlun yn dwyn yr enw 'Llesiant gwaith digidol'. Yna, mae wedi'i rannu'n ddwy golofn, yn nodi 'agweddau cadarnhaol' ac 'agweddau negyddol'. Dyma'r agweddau cadarnhaol: cyfathrebu gwell; cydweithio byd-eang; gweithio hyblyg; adnoddau i reoli llwyth gwaith; adnoddau i wneud pethau'n haws; creu hunaniaeth broffesiynol ar-lein gadarnhaol; cysylltiadau â rhwydweithiau proffesiynol/pwnc eraill. Dyma'r agweddau negyddol: gorlwytho digidol; gweithio bob amser (mynediad 24 awr); newidiadau i rolau/gweithgareddau swyddi; awtomateiddio tasgau (e.e. colli swydd); ergonomeg wael.

Ffigwr 8 Llesiant gwaith digidol.

Nid yw'r cwrs hwn wedi ymdrin â'r holl bwyntiau sydd wedi'u cynnwys yn y ffeithlun hyd yma. Ymdrinnir â rhai ohonynt (megis cyfathrebu) mewn adrannau dilynol; caiff pwyntiau eraill eu crybwyll ond byddent wedi'u labelu'n wahanol; ac mae rhai pwyntiau y tu hwnt i gwmpas y cwrs hwn. Mae'n bosibl y byddwch am ddefnyddio termau Jisc er mwyn gwneud gwaith ymchwil annibynnol ar y pynciau nad ydynt wedi'u cynnwys yma.

Mae ffordd wahanol o ddarlunio effeithiau cadarnhaol a negyddol posibl gweithio o bell a thechnoleg ar gydbwysedd rhwng gwaith a bywyd wedi'i hamlygu mewn ymchwil gan Dr Lara Pecis o Ysgol Reolaeth a Work Foundation Prifysgol Caerhirfryn, melin drafod sy'n gysylltiedig â'r Sefydliad Addysg Uwch hwnnw (Pecis a Florisson 2021). Dangosir hyn yn Ffigur 8.

Y ddelwedd a ddisgrifir
Ffigwr 9 Effeithiau cadarnhaol a negyddol o weithio o bell.
Dangos disgrifiad|Cuddio disgrifiad

Mae tair colofn yn y diagram hwn. Mae'r golofn ganol (sydd â phennawd o eiconau cyfrifiadur a'r ddaear) yn rhestru dau ddatganiad ynghylch gweithio o bell a thechnoleg. Pennawd y golofn chwith yw eicon 'bawd i lawr' ac mae'n rhestru'r effaith negyddol. Pennawd y golofn dde yw eicon 'bawd i fyny' ac mae'n rhestru'r effaith gadarnhaol. Y datganiad cyntaf yw 'Y gallu i weithio lle bynnag (a pha bryd bynnag) sy'n addas'. Effaith negyddol: 'Yn gallu arwain at ffiniau niwlog rhwng gwaith a bywyd ac anallu i ymlacio'r ymennydd'. Effaith gadarnhaol: 'Yn gallu gwella hyblygrwydd, cynhyrchedd a rheolaeth ganfyddedig dros waith'. Yr ail ddatganiad yw 'Dwysáu cysylltedd a chyfathrebu'. Effaith negyddol: 'Yn gallu arwain at "bresenoliaeth ar-lein", gostyngiadau mewn cynhyrchedd oherwydd hysbysiadau yn denu sylw, a gorlwytho gwybodaeth'. Effaith gadarnhaol: 'Yn gallu gwella cynhyrchiant ac ymgysylltiad, a chadw timau yn gysylltiedig.'.

Ffigwr 9 Effeithiau cadarnhaol a negyddol o weithio o bell.

Mae'r diagram hwn yn adlewyrchu dull y cwrs hwn o sicrhau llesiant yn fanylach. Yn yr adran nesaf, byddwn yn edrych yn fanylach ar lesiant cymdeithasol mewn gweithle hybrid.